Nike shares fell : स्निकर्स आणि क्रीडा साहित्य क्षेत्रातील दिग्गज कंपनी ‘नाईकी’ला चीनमधील कमकुवत मागणीमुळे पुन्हा एकदा विक्रीत घसरणीचा सामना करावा लागला आहे. व्यावसायिक आव्हाने असूनही कंपनीचे आर्थिक निकाल अपेक्षेप्रमाणे लागले आहेत. मात्र, बाजार बंद झाल्यानंतर नाईकीच्या शेअर्समध्ये ७ टक्क्यांहून अधिक घसरण नोंदवली गेली.

नाईकीने चौथ्या तिमाहीत १.०७ अब्ज डॉलर्स (प्रति शेअर ७२ सेंट्स) नफा जाहीर केला आहे, जो गेल्या वर्षी याच तिमाहीत २११ दशलक्ष डॉलर्स होता. या नफ्यामध्ये आंतरराष्ट्रीय आपत्कालीन आर्थिक शक्ती कायद्याच्या (आयईईपीए) शुल्क वसुलीमुळे मिळालेल्या ५२ सेंट्सच्या वाढीचा समावेश आहे. विश्लेषकांनी प्रति शेअर १२ सेंट्स कमाईचा अंदाज वर्तवला होता. दरम्यान, कंपनीचा महसूल १ टक्क्याने घसरून $१०.९७ अब्ज झाला आहे.

हेही वाचा – Tata Sierra EV : टाटा सिएरा ईव्ही भारतात लॉन्च; दमदार रेंज आणि ‘या’ आधुनिक फिचर्ससह बाजारात धुमाकूळ घालायला सज्ज! 

नाईकीची थेट विक्री ७ टक्क्यांनी घटली असली, तरी घाऊक विक्रीत ४ टक्क्यांची वाढ झाली आहे. उत्तर अमेरिकेत विक्री ३ टक्क्यांनी वाढली, मात्र चीनच्या बाजारपेठेत कंपनीला तब्बल १२ टक्क्यांची मोठी घसरण सोसावी लागली आहे. तसेच ‘कॉन्व्हर्स’ ब्रँड आणि स्पोर्ट्सवेअर उत्पादनांच्या विक्रीतही अडचणी येत आहेत.

सन २०२४ मध्ये कंपनीत परतलेले मुख्य कार्यकारी अधिकारी इलियट हिल यांच्या नेतृत्वाखाली नाईकी सध्या पुनरुज्जीवन योजनेवर काम करत आहे. महसुलाच्या आघाडीवर आव्हाने असली, तरी ‘परफॉर्मन्स प्रॉडक्ट्स’मधील प्रगती उत्साहवर्धक असल्याचे सीईओ हिल यांनी सांगितले. दरम्यान, नाईकीने आपल्या आर्थिक रचनेत मोठे बदल करत फायझरचे सध्याचे सीएफओ डेव्हिड डेंटन यांची नवीन मुख्य आर्थिक अधिकारी म्हणून नियुक्ती केली आहे. ते १७ ऑगस्ट रोजी मॅथ्यू फ्रेंड यांची जागा घेतील.