नेवासा: नेवासे नगरपंचायतीच्या आगामी निवडणुकीच्या पार्श्वभूमीवर शहरातील राजकीय वातावरण तापले आहे. विश्वसनीय सूत्रांनुसार, शहरातील दहा माजी नगरसेवक लवकरच उपमुख्यमंत्री एकनाथ शिंदे यांच्या शिवसेनेत प्रवेश करणार आहेत. यामुळे नेवासे शहरात राजकीय चर्चांना उधाण आले आहे. या माजी नगरसेवकांनी शिंदे सेनेचे ‘धनुष्यबाण’ चिन्ह हाती घेऊन निवडणुकीच्या रणांगणात उतरण्याचा निर्णय घेतला आहे. आणखी काही माजी नगरसेवकही शिंदे गटात सामील होण्याच्या तयारीत असल्याचे सूत्रांनी सांगितले. शिवसेनेत फूट पडल्यानंतर अनेक माजी नगरसेवक आणि पदाधिकारी उद्धव ठाकरे यांच्या गटाची साथ सोडून शिंदे सेनेत दाखल होत आहेत. नेवासे शहरातही हा ट्रेंड दिसून येत आहे. आमदार विठ्ठलराव लंघे-पाटील आणि शिवसेना नेते प्रभाकर (काका) शिंदे यांच्या मार्गदर्शनाखाली हे माजी नगरसेवक शिंदे गटात प्रवेश करणार आहेत. कोपरगाव येथील सभेत स्वत: एकनाथ शिंदे यांनी नेवासे येण्याचे संकेत दिले होते, त्यामुळे या प्रवेशाला अधिक महत्त्व प्राप्त झाले आहे. नगरपंचायत निवडणुकीसाठी प्रत्येक प्रभागात इच्छुकांची संख्या वाढत असल्याने राजकीय समीकरणे बदलत आहेत. या दहा माजी नगरसेवकांनी आपली राजकीय भविष्य पक्के करण्यासाठी शिंदे सेनेत जाण्याचा निर्णय घेतला आहे. येत्या काळात आणखी काही नेते शिंदे गटात सामील होण्याची शक्यता आहे. या घडामोडींमुळे नेवासे शहरातील निवडणुकीची रणधुमाळी आणखी रंगतदार होणार आहे.
