मुंबई : राष्ट्रवादी काँग्रेस शरदचंद्र पवार पक्षाचे अध्यक्ष शरद पवार यांनी विधानसभा निवडणुकीसंदर्भात केलेल्या एका धक्कादायक दाव्याने महाराष्ट्राच्या राजकारणात खळबळ उडाली आहे. पवार यांनी निवडणुकीपूर्वी दोन व्यक्तींनी त्यांना भेटून २८८ पैकी १६० जागा जिंकण्याची गॅरंटी दिल्याचा आणि मतांच्या फेरफारीबाबत चर्चा केल्याचा गौप्यस्फोट केला आहे. या दाव्याला प्रत्युत्तर देताना भाजप नेते व माजी केंद्रीय मंत्री रावसाहेब दानवे यांनी पवारांना थेट आव्हान दिले आहे. “त्या दोन व्यक्तींची नावे जनतेसमोर जाहीर करा,” असे दानवे म्हणाले.

पवारांचा दावा, दानवेंचे प्रत्युत्तर –

शरद पवार यांनी नुकतेच एका मुलाखतीत सांगितले की, “विधानसभा निवडणुकीपूर्वी दोन व्यक्ती मला भेटायला आल्या होत्या. त्यांनी मला १६० जागा निवडून आणण्याची गॅरंटी दिली होती आणि मतांच्या फेरफारीबाबत बोलत होते.” या दाव्याने राजकीय वर्तुळात एकच खळबळ उडाली. यावर रावसाहेब दानवे यांनी तीव्र शब्दांत प्रत्युत्तर दिले. ते म्हणाले, “विधानसभा निवडणुकीचा निकाल लागून सहा महिने उलटले, तरी महाविकास आघाडीला तो पचवता आलेला नाही. ईव्हीएम, मतदार यादी आणि मतदारसंख्येच्या वाढीवर यापूर्वीही आरोप झाले, आणि आता हा चौथा आरोप आहे. पवारांनी ज्या दोन व्यक्तींचा उल्लेख केला, ती नावे त्यांनी जाहीर करावीत. आजकाल सर्वत्र कॅमेरे आहेत, त्यामुळे त्या व्यक्ती कोण होत्या, हे जनतेसमोर आणावे.”

“ते अधिकारी नव्हे, सर्वे एजन्सीचे लोक” –

पवारांच्या आरोपांना खोडून काढताना दानवे म्हणाले, “निवडणुकीच्या काळात अनेक सर्वे एजन्सी येतात आणि ‘आम्ही तुम्हाला इतक्या जागा जिंकून देतो,’ असे सांगतात. अशा एजन्सींचे प्रतिनिधी उमेदवारांना आणि नेत्यांना भेटतात. पवारांनी उल्लेख केलेले ते दोन लोक अधिकारी नसून सर्वे एजन्सीचे प्रतिनिधी असण्याची शक्यता आहे. अशा एजन्सी लोकसभा आणि विधानसभा निवडणुकीवेळी आमच्याकडेही आल्या होत्या.”

पवारांना थेट आव्हान –

दानवे यांनी पवारांच्या दाव्याला बिनबुडाचा आणि तथ्यहीन ठरवताना सांगितले की, “पवारांचे आरोप महाराष्ट्रातील जनतेचा अपमान करणारे आहेत. जर खरोखरच त्या दोन व्यक्ती अधिकारी असतील आणि सरकारला लक्ष्य करण्याचा हेतू असेल, तर पवारांनी त्यांची नावे जाहीर करावीत. त्यांचे आरोप निराधार असून, त्यामागे कोणतेही तथ्य नाही.” दानवे यांनी पवारांना या प्रकरणाचा खुलासा करण्याचे थेट आव्हान दिले आहे.

राजकीय वातावरण तापले –

पवारांच्या या दाव्याने आणि दानवेंच्या प्रत्युत्तराने राज्यातील राजकीय वातावरण चांगलेच तापले आहे. काँग्रेस नेते राहुल गांधी यांनी यापूर्वीच निवडणूक आयोगावर सातत्याने आरोप केले असताना, पवारांचा हा नवा दावा विरोधकांना नवी दिशा देणारा ठरू शकतो. दुसरीकडे, भाजपने या आरोपांना तथ्यहीन ठरवत पवारांवरच पलटवार केला आहे. आता पवार हे आव्हान स्वीकारून त्या दोन व्यक्तींची नावे जाहीर करतात का, याकडे सर्वांचे लक्ष लागले आहे.