Jio IPO :  रिलायन्स इंडस्ट्रीजची डिजिटल सेवा शाखा असलेल्या जिओ प्लॅटफॉर्म्स लिमिटेडने शुक्रवारी प्रारंभिक सार्वजनिक ऑफर (आयपीओ) साठी मसुदा दाखल केला आहे. हा आतापर्यंतचा सर्वात मोठा आयपीओ मानला जात असून, यातून अंदाजे 4 अब्ज डॉलर्स (सुमारे 37,700 कोटी रुपये) निधी उभारला जाण्याची शक्यता आहे.

ड्राफ्ट रेड हेरिंग प्रॉस्पेक्टस नुसार, जिओ प्लॅटफॉर्म्स 27 कोटी नवीन शेअर्स देऊ करणार आहे. इश्यूनंतर हे प्रमाण एकूण इक्विटी बेसच्या 2.9 टक्के असेल. मसुद्यानुसार, इश्यूमधून मिळणारा निव्वळ निधी प्रमुख उपकंपनी, म्हणजेच आरजेआयएलने घेतलेल्या काही थकीत कर्जांची पूर्ण किंवा अंशतः परतफेड करण्यासाठी आणि सामान्य कॉर्पोरेट उद्देशांसाठी वापरला जाईल.

सूत्रांनी दिलेल्या माहितीनुसार, कंपनीला सुमारे 37,700 कोटी रुपये उभारण्याची अपेक्षा आहे, ज्यामुळे हा देशातील आतापर्यंतचा सर्वात मोठा आयपीओ ठरेल. या अंदाजित निधी उभारणीमुळे जिओ प्लॅटफॉर्म्सचे मूल्य सुमारे 137 अब्ज डॉलर्स असण्याची शक्यता आहे. एका सूत्राने दिलेल्या माहितीनुसार, आयपीओमधून मिळणारा निधी 27,500 कोटी रुपयांच्या थकीत कर्जाची परतफेड/पूर्व-परतफेड आणि सर्वसाधारण कॉर्पोरेट उद्देशांसाठी वापरला जाईल.

जिओ प्लॅटफॉर्म्सने यापूर्वी जगातील काही सर्वात मोठ्या तंत्रज्ञान आणि खासगी इक्विटी गुंतवणूकदारांना आकर्षित केले आहे. 2020 मध्ये, जिओ प्लॅटफॉर्म्सने फेसबुकचे प्रवर्तक असलेल्या मेटाकडून 9.99 टक्के हिस्सेदारीसाठी 43,574 कोटी रुपये आणि गुगलकडून 7.73 टक्के हिस्सेदारीसाठी 33,737 कोटी रुपये उभारले होते.

याव्यतिरिक्त, जिओ प्लॅटफॉर्म्सने सिल्व्हर लेक, व्हिस्टा इक्विटी पार्टनर्स, जनरल अटलांटिक, केकेआर, मुबाडाला, एडीआयए, टीपीजी, एल कॅटरटन, पीआयएफ, इंटेल कॅपिटल आणि क्वालकॉम व्हेंचर्स यांसारख्या जागतिक वित्तीय प्रायोजक, सार्वभौम गुंतवणूकदार आणि धोरणात्मक गुंतवणूकदारांच्या प्रमुख गटाकडून सुमारे 15.2 टक्के हिस्सेदारीसाठी अंदाजे 74,745 कोटी रुपये उभारले होते.

सध्या जिओ प्लॅटफॉर्म्समध्ये रिलायन्स इंडस्ट्रीजची 66.43 टक्के हिस्सेदारी आहे, तर मेटाकडे 9.99 टक्के हिस्सेदारी आहे, जी 2020 मध्ये 5.7 अब्ज डॉलर्सच्या गुंतवणुकीद्वारे मिळवण्यात आली होती. हा आयपीओ 2008 नंतर समूहाचा पहिला सार्वजनिक प्रस्ताव असेल आणि या समूहातील ग्राहक-केंद्रित कंपनीचा हा पहिलाच प्रस्ताव असेल.