पुणे – शहरातील गुन्हेगारी घटना, तसेच समाज माध्यमात ‘पुण्याचा मालक’ म्हणून चित्रफीत प्रसारित करून दहशत माजविल्याप्रकरणी कोथरुडमधील गुंड गजानन उर्फ गज्या पंढरीनाथ मारणे याची शनिवारी गुन्हे शाखेकडून चौकशी करण्यात आली. मारणेला गुन्हे शाखेतील अधिकाऱ्यांनी पोलिसी भाषेत ‘समज’ दिली का नाही हे समजू शकले नाही. मात्र तो ऐटीत गुन्हे शाखेच्या कार्यालयात खुर्चीवर पायावर पाय ठेऊन बसला होता. इतर गुन्हेगारांना पोलीस जमिनीवर मांडी घालून बसवतात. मात्र गज्या अशा ऐटीत बसला की जसा काय तो पोलीस आयुक्तालयाचा मालकच आहे.

मारणे याची कोथरुड परिसरात दहशत आहे. मारणे आणि साथीदारांनी समाज माध्यमात दहशत पसरविणारी चित्रफीत प्रसारित केली होती. मागील काही दिवसांत त्याच्या अनेक चित्रफीती शहरात फिरत आहेत. त्यांना पुण्याचा मालक अशी कॅप्शन दिली जाते. हा मुद्दा अनेकांनी वरिष्ठ पोलीस अधिकाऱ्यांच्या निदर्शणास आणून दिला. तसेच शहरातील गंभीर गुन्हेगारी घटनांच्या पार्श्वभूमीवर गुन्हे शाखेतील अधिकाऱ्यांनी शनिवारी मारणेला चौकशीसाठी पोलीस आयुक्तयालयात बोलाविले. मारणेला पोलिसांनी समज दिली.

व्यावसायिकाकडे २० कोटी रुपयांची खंडणी मागितल्या प्रकरणी कोथरुडमधील गुंड गज्या मारणे याच्यासह साथीदारांना गुन्हे शाखेच्या खंडणी विरोधी पथकाने मागील वर्षी अटक केली होती. या प्रकरणी मारणे याच्यासह १८ साथीदारांच्या विरुद्ध पोलिसांनी गुन्हा दाखल केला होता त्यानंतर न्यायालयाने मारणे याची २५ हजार रुपयांच्या वैयक्तिक जातमुचलक्यावर सुटका करण्याचे आदेश दिले.

मारणे याची कोथरुड परिसरात दहशत आहे. त्याच्या विरुद्ध खून, खुनाचा प्रयत्न, खंडणी असे गंभीर स्वरुपाचे गुन्हे दाखल आहेत. खून प्रकरणात न्यायालयाने मारणे याची जामीनावर मुक्तता केली होती. त्या वेळी मारणे याच्या साथीदारांनी नवी मुंबईतील तळोजा कारागृहातून मोटारीतून फेरी काढली. तळाेजा कारागृह ते कोथरुडपर्यंत काढलेल्या फेरीत ३०० ते ४०० मोटारी होत्या. द्रुतगती मार्गावर मारणे टोळीतील सराइतांनी दहशत माजविली होती. याबाबतची ध्वनीचित्रफित समाजमाध्यमावर प्रसारित झाल्यानंतर पोलिसांनी मारणे आणि साथीदारांच्या विरुद्ध कोथरुड, खालापूर, शिरगाव पोलीस ठाण्यात गुन्हे दाखल करण्यात आले होते.

गज्या मारणेला गुन्हे शाखेत दिलेल्या व्हिआयपी ट्रिटमेंटबद्दल खुद्द पोलीस कर्मचाऱ्यांकडूनच नाराजी व्यक्त करण्यात आली. गुन्हेगाराला असे खुर्चीवर बसवले जात असेल तर गुन्हेगारांमध्ये पोलिसांची काहीच इज्जत रहाणार नाही. इतर गुन्हेगारांना फरशीवर बसवून चौकशी केली जाती. मात्र मोठ्या गुंडांना अशी वागणूक दिल्यावर आमचे मनोधोर्य कसे काय वाढेल? असा सवाल पोलीस कर्मचारी करत होते.