Newasa News : नेवासे शहरात (Newasa News) गेल्या अनेक महिन्यांपासून मोकाट कुत्रे आणि भटक्या जनावरांचा उपद्रव शिगेला पोहोचला असून प्रशासनाच्या डोळ्यात झणझणीत अंजन घालण्यासाठी संतप्त नागरिकांनी थेट नगरपंचायतीवर धडक मोर्चा काढला.

नगरपंचायतीच्या ढिसाळ कारभाराचा निषेध नोंदवताना आंदोलकांनी चक्क एका अधिकाऱ्याला साडी आणि बांगड्यांचा आहेर दिल्याने प्रशासकीय वर्तुळात प्रचंड खळबळ उडाली आहे.

नेवासे पंचायत समितीच्या (Newasa News) प्रवेशद्वारापासून सोमवारी या मोर्चाला सुरुवात झाली. मुख्य रस्त्यावरून जोरदार घोषणाबाजी करत मोर्चेकरी थेट नगरपंचायत कार्यालयात दाखल झाले. संतप्त नागरिकांनी सर्वात आधी मुख्याधिकाऱ्यांच्या दालनात धाव घेतली, मात्र मुख्याधिकारी जागेवर उपस्थित नसल्याचे समोर येताच आंदोलकांचा रोष अनावर झाला. शहरात तातडीने कर्तव्यदक्ष मुख्याधिकाऱ्याची नियुक्ती करण्यात यावी, अशी आक्रमक मागणी यावेळी करण्यात आली.

यानंतर हा मोर्चा थेट नगराध्यक्षांच्या दालनात धडकला. तेथे उपस्थित असलेले कार्यालयीन अधीक्षक सागर झावरे यांना आंदोलकांनी घेराव घालत जाब विचारला. अनेक महिन्यांपासून मोकाट कुत्र्यांनी शाळकरी मुलांसह नागरिकांचा चावा घेतला असून प्रशासन केवळ पोकळ आश्वासने देत असल्याचा आरोप करण्यात आला.

याच वेळी आंदोलनाचे नेतृत्व करणारे सामाजिक कार्यकर्ते शांताराम गायके यांनी परिधान केलेली साडी काढून थेट अधीक्षक सागर झावरे यांना साडी आणि बांगड्यांचा आहेर सुपूर्द केला. या अनपेक्षित आणि अनोख्या निषेधामुळे दालनात काही काळ तणावपूर्ण शांतता पसरली.

या संपूर्ण प्रकारानंतर दालनात उपस्थित असलेले नगराध्यक्ष डॉ. करणसिंह घुले पाटील यांनी मध्यस्थी करत आंदोलकांच्या भावना रास्त असल्याचे मान्य केले. मोकाट जनावरांच्या कायमस्वरूपी बंदोबस्तासाठी जागेची पाहणी सुरू असून बाहेरून शहरात कुत्रे आणून सोडणाऱ्यांवर नजर ठेवण्यासाठी पुलाच्या परिसरात सीसीटीव्ही कॅमेरे बसवून कडक कारवाई केली जाईल, अशी ग्वाही त्यांनी दिली.

या आक्रमक आंदोलनाचे (Newasa News) नेतृत्व सामाजिक कार्यकर्ते शांताराम गायके, शिवा राजगिरे आणि विकास चव्हाण यांनी केले. या मोर्चात आम आदमी पार्टीचे राज्य नेते ॲड. संजय सुखदान, भाजप शहर मंडल अध्यक्ष मनोज पारखे, अल्ताफ पठाण, बंडू आल्हाट, विकास पोतदार, अनिल सोनवणे, योगेश वर्मा, राहुल मुंडलिक, रुपेश उपाध्ये, सुलेमान मणियार, व्यापारी गफूरभाई कुरेशी, इम्रानभाई दारूवाले, कुणाल मांडण, जमीर बागवान, इम्रान पटेल, सरफराज पठाण यांच्यासह नागरिक मोठ्या संख्येने सहभागी झाले होते.