NEET Scam 2026 – देशभरात गाजत असलेल्या नीट पेपरफुटी प्रकरणाचे धागेदोरे आता पुण्यापर्यंत पोहोचले असून या घोटाळ्यातील पुणे कनेक्शन समोर आले आहे. सीबीआयने अहिल्यानगर जिल्ह्यातील राहुरी येथून मुख्य संशयित धनंजय लोखंडे याला ताब्यात घेतले. त्यानंतर लोखंडेच्या संपर्कात असलेल्या बिबवेवाडीतील मनीषा वाघमारे आणि इंजिनिअरींग करणाऱ्या विद्यार्थ्याला पुणे पोलिसांनी ताब्यात घेत चौकशी केली. विद्यार्थी शोधणे, त्यांच्याकडून पैसे गोळा करणे आणि संशयितांपर्यंत पोहोचवणे, अशी भूमिका या दोघांची असल्याचा संशय तपास यंत्रणांना आहे. केंद्रीय अन्वेषण विभागाने (सीबीआय) नीट पेपरफुटी प्रकरणाचा तपास हाती घेतल्यानंतर महाराष्ट्रातही हालचाली वेगाने सुरू झाल्या आहेत. तपासादरम्यान धनंजय निवृत्ती लोखंडे (वय २६) हा महत्त्वाचा संशयित असल्याचे समोर आले. गेली चार-पाच वर्षे तो पुण्यातील वाघोली परिसरात राहत होता. मंगळवारी (दि.१२) पुणे पोलिसांना वाघोली परिसरात लोखंडे याचे लोकेशन मिळाले होते. मात्र, पोलिसांची चाहूल लागताच तो तेथून पसार झाला. त्यानंतर मध्यरात्रीनंतर राहुरी परिसरातून सीबीआयने त्याला ताब्यात घेतले. तपासादरम्यान धनंजय लोखंडे याच्या संपर्कात बिबवेवाडीतील मनीषा वाघमारे (वय ४७, रा. सुखसागर, बिबवेवाडी) असल्याची माहिती पुणे पोलिसांना मिळाली. त्यानुसार बुधवारी (दि.१३) सकाळी आठच्या सुमारास पोलिसांनी तिला संशयित म्हणून ताब्यात घेतले. दुपारी दोनच्या सुमारास तिला सीबीआयच्या ताब्यात देण्यात आले. मनीषा वाघमारे ही व्यवसायाने ब्युटी पार्लर चालक असून तिचा पती दंतचिकित्सक असल्याची माहिती समोर आली आहे. गेल्या तीन वर्षांपासून ती धनंजय लोखंडेच्या संपर्कात असल्याचे तपासात निष्पन्न झाले आहे. प्राथमिक चौकशीत ती विद्यार्थ्यांना लोखंडेपर्यंत पोहोचवण्याचे काम करत असल्याचा संशय व्यक्त करण्यात येत आहे. तपासात समोर येत असलेल्या माहितीनुसार, पुण्यातून विद्यार्थ्यांपर्यंत पोहोचणारे एक स्वतंत्र नेटवर्क कार्यरत असल्याचा संशय तपास यंत्रणांना आहे. अमितेश कुमार, पोलिस आयुक्त, पुणे शहर नीटसारख्या अत्यंत महत्त्वाच्या परीक्षेच्या नावाखाली विद्यार्थ्यांना आणि पालकांना आमिष दाखवून लाखो रुपयांची उकळपट्टी केली गेली असण्याची शक्यता तपासली जात आहे. सीबीआय, पुणे पोलिसांची गुन्हे शाखा आणि स्थानिक पोलिसांकडून मोबाइल रेकॉर्ड, आर्थिक व्यवहार, बँक खात्यांची माहिती आणि आरोपींमधील संपर्क यांची पडताळणी सुरू असून या प्रकरणात आणखी काही नावे समोर येण्याची शक्यता व्यक्त केली जात आहे. …वाघमारेच्या खात्यावर आले पैसे पोलिसांनी वाघमारेचा मोबाइल फोन जप्त केला असून त्याच्या तपासात धक्कादायक माहिती समोर आली आहे. नीट परीक्षेच्या कालावधीतच तिच्या खात्यात सुमारे १० लाख रुपयांचे व्यवहार झाल्याचे प्राथमिक तपासात दिसून आले आहे. हे पैसे विद्यार्थ्यांकडून किंवा त्यांच्या पालकांकडून घेण्यात आले होते का, याचा तपास आता पोलीस करीत आहेत. तसेच, तिने मोबाइल मधील काही मेसेज डिलीट केले आहेत. विद्यार्थी शोधण्याची जबाबदारी सोळंकीकडे? पुणे पोलिसांनी बुधवारी (दि.१३) दुपारी मांजरी परिसरातून शेषराव सोळंकी या तरुणाला ताब्यात घेतले आहे. तो नामांकित महाविद्यालयात इंजिनिअरींगच्या द्वितीय वर्षात शिक्षण घेत असल्याची माहिती पोलिसांनी दिली. सोळंकीकडे नीट परीक्षेसाठी इच्छुक विद्यार्थ्यांचा शोध घेणे, त्यांच्याशी संपर्क साधणे, अशी जबाबदारी होती का, त्यादृष्टीने पोलीस तपास करीत आहेत. “नीट पेपरफुटी प्रकरणात संशयावरून महिलेसह दोघांना ताब्यात घेतले. प्राथमिक चौकशी करून महिलेला सीबीआयच्या ताब्यात दिले आहे. तर, तरुणाकडे चौकशी केली जात आहे.” – अमितेश कुमार, पोलीस आयुक्त
