Neelam Gorhe : ठाकरेसेना आणि काँग्रेसने विधान परिषदेच्या उपसभापती नीलम गोऱ्हे यांच्या विरोधात नोटीस सादर केली आहे. एका आयपीएस अधिकाऱ्याच्या निलंबनाचे आदेश देऊन त्यांनी आपल्या अधिकारांचा गैरवापर केल्याचा आरोप करत, त्यांना पदावरून हटवण्याची मागणी या नोटीसद्वारे करण्यात आली आहे. या दोन विरोधी पक्षांनी विधान परिषदेच्या सभापतींकडे ही नोटीस सादर केली. आज गोऱ्हे यांचा निरोप समारंभ आयोजित करण्यात आला होता. मे महिन्यात त्यांचा कार्यकाळ संपत आहे आणि आजच गोऱ्हे यांना पदावरून हटवण्याची मागणी करणारी नोटीस सादर करण्यात आली आहे. सोमवारी ठाकरेसेनेचे विधान परिषद सदस्य अनिल परब यांनी गोऱ्हे यांच्यावर अधिकारांच्या गैरवापराचा आरोप केला. जिल्हा परिषदेच्या अध्यक्षपदाच्या निवडणुकीदरम्यान झालेल्या गोंधळाच्या पार्श्वभूमीवर आयपीएस अधिकारी तथा साताऱ्याचे पोलीस अधीक्षक (एसपी) तुषार दोशी यांना निलंबित करण्याचे निर्देश त्यांनी सरकारला दिले होते. गोऱ्हे यांच्या विरोधातील या नोटीसवर अनिल परब, सुनील शिंदे आणि सचिन अहिर तसेच काँग्रेसचे भाई जगताप, धीरज लिंगाडे आणि अपक्ष आमदार सुधाकर अडबाले यांच्या स्वाक्षऱ्या आहेत. मात्र, राष्ट्रवादी काँग्रेसचे (शप) शशिकांत शिंदे यांनी या नोटीसवर स्वाक्षरी केली नाही. साताऱ्याच्या पोलीस अधीक्षकांच्या निलंबनाबाबत गोऱ्हे यांनी घेतलेल्या भूमिकेचे त्यांनी समर्थन केले होते.