लंडन – भारत विरुद्ध इंग्लंड महिला क्रिकेट संघादरम्यान झालेल्या पहिल्या टी २० सामन्यात हरलीन देओलने सीमेरेषेवर जबरदस्त झेल पकडला. या झेलचं सर्वच स्तरातून कौतुक होत आहे. सोशल मीडियावर या झेल पकडल्याचा व्हिडिओ वेगाने व्हायरल होत आहे. या झेलसाठी नेटकऱ्यांनी तिला सुपरवुमन म्हणून संबोधलं आहे.

देओलने टिपला अविश्वसनीय झेल
इंग्लंड संघाची फलंदाजी सुरू असताना तिने १९ व्या षटकात अविश्वसनीय झेल टिपला, जे पाहून सर्वांनाच आश्चर्य झाले होते. एमी जोन्सने शिखा पांडेच्या चेंडूवर अप्रतिम शॉट खेळला होता. प्रत्येकाला वाटते होते की, तो चेंडू आरामात सीमारेषेबाहेर ६ धावांसाठी जाईल.

परंतु तिथे क्षेत्ररक्षण करत असलेल्या हरलीन देओलने हवेत उडी मारत झेल टिपला. झेल टिपल्यानंतर तिला जाणवले होते की, तिचा पाय सीमारेषेला स्पर्श करणार आहे.

त्यामुळे तिने तो चेंडू आत फेकला आणि स्वतः सीमारेषेच्या बाहेर गेली होती. त्यानंतर चेंडू हवेत असतानाच तिने आत येऊन पुन्हा एकदा डाईव्ह मारत झेल टिपला. या झेलचा व्हिडिओ सोशल मीडियावर धुमाकूळ घालत आहे.

हरलीनने इंग्लंडच्या एमी जोन्सचा अप्रतिम झेल घेत तिला तंबूचा रस्ता दाखवला. एमीचा खेळपट्टीवर चांगलाच जम बसला होता. तिच्या आक्रमक खेळीमुळे भारतीय गोलंदाजांची दाणादाण उडाली होती. तिने २७ चेंडूत ४३ धावा केल्या. यात ४ चौकार आणि २ षटकारांचा समावेश आहे.

भारताने इंग्लंड विरुद्धचा पहिला सामना गमवला असला तरी हरलीन देओलच्या झेलची चर्चा सर्वत्र रंगली आहे. या झेलनंतर अनेक क्रिकेटपटूंनी हरलीनचं कौतुक केलं आहे.. तसेच पंतप्रधान नरेंद्र मोदीही तिचे कौतुक करण्यापासून स्वतःला आवरू शकले नाहीत. त्यांनी आपल्या इंस्टाग्राम स्टोरीवर तिचा झेल टिपल्याचा व्हिडिओ शेअर केला.

तसेच हरलीनला टॅग करत त्यांनी लिहिले की, “अविश्वसनीय, खूपच सुंदर..” तसेच सचिन तेंडुलकर, हरभजन सिंग आणि वीवीएस लक्ष्मण यांसारख्या दिग्गज खेळाडूंनी देखील तिचे कौतुक केले आहे.