सोलापूर : राष्ट्रवादी काँग्रेस (अजित पवार गट) पक्षाचे सोलापूर जिल्हाध्यक्ष उमेश पाटील यांनी आमदार नसतानाही आपल्या खासगी वाहनावर ‘आमदार’ लोगो लावल्याने मोठा वाद निर्माण झाला आहे. सोलापूर विश्रामगृह परिसरात त्यांच्या MH04 HD 5565 क्रमांकाच्या गाडीवर हा लोगो दिसून आल्यानंतर स्थानिकांमध्ये आणि राजकीय वर्तुळात जोरदार चर्चा सुरू झाली आहे.

महाराष्ट्र शासनाच्या नियमानुसार, केवळ 288 विधानसभा आणि 78 विधान परिषद सदस्यांनाच शासकीय कामासाठी गाडीवर ‘आमदार’ लोगो लावण्याचा अधिकार आहे. उमेश पाटील यांनी अनधिकृतपणे हे चिन्ह वापरल्याने कायद्याचा भंग झाल्याचा आरोप होत आहे.

मला आमदार झाल्यासारखं वाटतंय : उमेश पाटील

उमेश पाटील यांना या प्रकरणी विचारले असता त्यांनी हलक्या-फुलक्या शब्दांत, “मला आमदार झाल्यासारखं वाटतंय, म्हणून मी लोगो लावला,” असे उत्तर दिले. या विधानाने राजकीय आणि प्रशासकीय वर्तुळात भुवया उंचावल्या असून, त्यांच्या या बेफिकीर वृत्तीवर टीका होत आहे.

सामान्य नागरिक आणि विरोधी पक्षांनी या प्रकाराला ‘सत्तेचा माज’ आणि ‘कायद्याचा अवमान’ असे संबोधले आहे. स्थानिक कार्यकर्त्यांनी याबाबत प्रशासनाकडे तक्रार दाखल करण्याची मागणी केली आहे.

स्थानिकांचे कारवाईकडे लक्ष

महाराष्ट्र मोटार वाहन कायद्यांतर्गत, कोणत्याही व्यक्तीने अनधिकृतपणे शासकीय लोगो किंवा प्रतीके वापरणे हा कायद्याचा भंग मानला जातो. यामुळे दिशाभूल, गैरप्रकार आणि शासकीय सवलतींचा गैरवापर होण्याची शक्यता असते.

यापूर्वी 2016 मध्ये सोलापुरातच भाजप नेते आणि तत्कालीन सहकारमंत्री चंद्रकांत पाटील यांच्या गाडीवर अनधिकृत ‘BJP’ लोगोसह नंबर प्लेट आढळल्याने वाद झाला होता. तेव्हा परिवहनमंत्री दिवाकर रावते यांनी कारवाईचे आदेश दिले होते.

उमेश पाटील यांच्या प्रकरणातही स्थानिक पोलिस आणि परिवहन विभागाकडून चौकशी आणि कारवाईची मागणी जोर धरत आहे. सोलापूरचे प्रादेशिक परिवहन अधिकारी यांनी या प्रकरणाची दखल घेतली असून, लवकरच तपास सुरू होण्याची शक्यता आहे.