Navra Mazha Navsacha | Ashok Saraf | Laxmikant Berde | Sachin Pilgaonkar : अभिनेते सचिन पिळगावकर, सुप्रिया पिळगावकर आणि अशोक सराफ यांचा 2004 मध्ये प्रदर्शित झालेला ‘नवरा माझा नवसाचा’ चित्रपट सुपरहिट ठरला होता. या चित्रपटासह त्यातील गाणी देखील प्रेक्षकांच्या प्रचंड पसंतीस पडली होती. आजही या चित्रपटाची क्रेझ पाहायला मिळते. नुकतंच या सिनेमाचा दुसरा भाग देखील प्रेक्षकांच्या भेटीला आला होता. ‘नवरा माझा नवसाचा’ चित्रपटात सचिन पिळगांवकर, सुप्रिया पिळगांवकर, निर्मिती सावंत, किशोरी शहाणे, जयवंत वाडकर अशोक सराफ, रीमा लागू, विजय पाटकर, कुलदीप पवार, सतिश तारे, प्रदीप पटवर्धन, अतुल परचुरे, आनंद अभ्यंकर, विकास समुद्रे, अली असगर, सुनिल तावडे, वैभव मांगले, मधुराणी गोखले, जॉनी लिव्हर आणि सोनू निगम हे कलाकार झळकले होते. मात्र, या सिनेमात सचिन यांना दिवंगत अभिनेते लक्ष्मीकांत बेर्डे यांना घ्यायचं होतं, पण त्यावेळी लक्ष्यानं स्पष्ट नकार दिल्याचं स्वतः सचिन पिळगांवकर म्हणाले आहेत. ‘अशी ही बनवा बनवी’ या प्रसिद्ध सिनेमात सचिन पिळगांवकर, अशोक सराफ आणि लक्ष्मीकांत बेर्डे हे त्रिकुट एकत्र दिसलं होत. याव्यतिरिक्त निवेदिता जोशी-सराफ, अश्विनी भावे, सुप्रिया पिळगांवकर यांसारख्या अभिनेत्रीही झळकल्या होत्या. काही दिवसांपूर्वी एका मुलाखतीत बोलताना सचिन पिळगांवकर यांनी अशोक सराफ, लक्ष्मीकांत बेर्डे यांच्यासोबतच्या मैत्रीवर भाष्य केलेलं. त्यासोबत ‘नवरा माझा नवसाचा’ याबद्दल काही गोष्टी बोलून दाखवल्या होत्या. यावेळी सचिन पिळगांवकरांनी सांगितलं की, “लक्ष्याला मी खूप मिस करतो. ‘नवरा माझा नवसाचा’ हा चित्रपट 2005 मध्ये प्रदर्शित झाला. तो 2004 मध्येच मी बनवला होता. जानेवारी 2005 मध्ये तो थिएटरमध्ये प्रदर्शित झाला होता. त्या चित्रपटात मला त्याला (लक्ष्मीकांत बेर्डे) घ्यायचं होतं. पण त्याच्या तब्येतीमुळे मी नाही घेऊ शकलो… त्याने स्वत:च मला नकार दिला होता. “तू म्हणतोयस, त्याचा मला आनंद आहे. पण मला डॉक्टरांनी परवानगी दिली नाही”, असं तो म्हणाला होता. त्यामुळे तो त्या चित्रपटात नव्हता. दुर्दैवानं डिसेंबर 2004 मध्येच तो आपल्याला सोडून गेला. फक्त मीच नाही तर प्रेक्षक आणि संपूर्ण इंडस्ट्री त्याला मिस करते. पण माझं त्याला मिस करणं हे फक्त इंडस्ट्रीला मर्यादित ठेवून नाही. माझ्या वैयक्तिक जीवनातसुद्धा मी त्याला मिस करतो…” असं यावेळी सचिन म्हणाले. मराठीतला मास्टरपीस ‘अशी ही बनवाबनवी’ मराठी चित्रपटसृष्टीचा आत्मा समजला जाणारा ‘अशी ही बनवाबनवी’ आजही प्रेक्षकांच्या मनात कायम घर करून राहतो. 23 सप्टेंबर 1988 रोजी हा चित्रपट रुपेरी पाड्यावर आला होता. चित्रपटाला इतकी वर्षं झाली असली तरी या चित्रपटाची लोकप्रियता थोडी देखील कमी झालेली नाही. आजही या चित्रपटातील डायलॉग सर्वांनाच वेड लावतात. मराठी चित्रपटाच्या इतिहासात क्वचित एखाद्या चित्रपटाला असे भाग्य लाभले आहे. सध्या आजूबाजूला घडणाऱ्या घटना नेमक्या शब्दात मांडण्यासाठीही या चित्रपटातील संवाद, दृश्यं यांचाच सर्वाधिक वापर केला जातो. आजच्या पिढीने देखील या चित्रपटाला डोक्यावर घेतल्याचे दिसून येत आहे. दरम्यान, हा चित्रपट ‘बिवी और मकान’ या हृषिकेश मुखर्जी यांच्या प्रसिद्ध चित्रपटाचा रिमेक आहे.
