नवले हाॅस्पिटल व्यवस्थापनाविरोधात आमरण उपोषणाचा इशारा
Navale Hospital: नऱ्हे येथील श्रीमती काशीबाई नवले मेडिकल कॉलेज आणि जनरल हॉस्पिटलमधील डॉक्टर, परिचारिका, कर्मचाऱ्यांना गेल्या नऊ महिन्यांपासून वेतन मिळालेले नाही. परिणामी दिवाळी सणाच्या तोंडावर कर्मचाऱ्यांवर उपासमारीची वेळ आली आहे. त्यामुळे भारतीय कामगार कर्मचारी महासंघातर्फे रुग्णालयात कर्मचाऱ्यांसह तीव्र आंदोलन करण्यात आले.

आठवडाभरात वेतन मिळाले नाही, तर आमरण उपोषण, साखळी उपोषण, घोषणाबाजी आणि मोर्चा अशा मार्गांनी आंदोलन करण्यात येईल, असा इशारा महासंघाने दिला आहे.

आंदोलनामुळे कायदा-सुव्यवस्थेचा प्रश्न निर्माण झाल्यास, औद्योगिक शांतता बिघडल्यास किंवा दैनंदिन कामकाजावर परिणाम झाल्यास त्याची जबाबदारी व्यवस्थापनाची असेल, असे संघटनेचे अध्यक्ष दिलीप जगताप आणि सचिव आमदार भाई जगताप यांच्या नावाने पत्रक काढून मुख्यमंत्र्यांसह, आरोग्यमंत्री आणि स्थानिक प्रशासकीय संस्था, व्यवस्थापन विभागाकडे पाठवले आहे.

या वेळी कामगारांच्या वेतनाचा प्रश्न केवळ आर्थिक अडचणीपुरता मर्यादित नसून, कर्मचाऱ्यांच्या कुटुंबीयांच्या उदरनिर्वाहाचा प्रश्न निर्माण झाला असल्याचे संघटनेने व्यवस्थापनाला पाठविलेल्या पत्रात नमूद केले आहे. नियमित वेतन मिळत नसल्यामुळे घरखर्च, भाडे भरणे, जीवनावश्यक वस्तू खरेदी करणे आणि कर्जाची परतफेड करणे अशक्य झाल्याचे संघटनेने स्पष्ट केले आहे.