पिंपरी – राष्ट्रीय जंतनाशक दिनानिमित्त पिंपरी-चिंचवड शहरात मंगळवार, दि. २७ ऑक्टोबर रोजी जंतनाशक मोहीम राबविण्यात येणार आहे. या मोहिमेअंतर्गत एक ते १९ वर्षे वयोगटातील पात्र बालके आणि विद्यार्थ्यांना जंतनाशक गोळ्या देण्यात येणार आहेत.

शाळा, अंगणवाड्या तसेच विविध शैक्षणिक संस्थांमधून ही मोहीम राबविण्यात येणार असून, गोळी घेण्यापासून वंचित राहिलेल्या बालकांसाठी ३ नोव्हेंबर रोजी पुन्हा संधी उपलब्ध करून देण्यात येणार आहे.

बालकांच्या आरोग्यावर आणि पोषणावर जंतसंसर्गाचा परिणाम होऊ शकतो. त्यामुळे या वयोगटातील बालकांना जंतसंसर्गापासून संरक्षण मिळावे, या उद्देशाने ही मोहीम आयोजित करण्यात आली आहे. महापालिका शाळांसह शासकीय, अनुदानित आणि विनाअनुदानित खासगी शाळा, अंगणवाडी केंद्रे, कनिष्ठ व वरिष्ठ महाविद्यालये तसेच नियोजित शैक्षणिक संस्थांतील पात्र लाभार्थ्यांचा यात समावेश असेल.

शाळांमध्ये शिक्षकांच्या देखरेखीखाली, तर अंगणवाडी केंद्रांमध्ये अंगणवाडी सेविका, आशा कार्यकर्त्या आणि आरोग्य कर्मचाऱ्यांच्या समन्वयातून गोळ्यांचे वितरण करण्यात येणार आहे. शाळाबाह्य बालके आणि किशोरवयीन मुला-मुलींपर्यंतही मोहिमेचा लाभ पोहोचविण्याचे नियोजन आहे.

३ नोव्हेंबर रोजपी माॅप-अप दिन
२७ ऑक्टोबर रोजी काही कारणास्‍तव जंतनाशक गोळी घेऊ न शकलेल्या बालकांची नोंद करून त्यांना ३ नोव्हेंबर रोजी आयोजित मॉप-अप दिनी गोळी देण्यात येणार आहे. यासाठी पात्र लाभार्थ्यांची यादी तयार करून त्यांच्यापर्यंत पोहोचण्याचे नियोजन करण्यात आले आहे.

शाळा आणि अंगणवाडी केंद्रांमध्ये गोळी घेतलेल्या लाभार्थ्यांची नोंद ठेवली जाणार आहे. महापालिका आयुक्त डॉ. विजय सूर्यवंशी यांनी पालकांना आपल्या पाल्यांना या मोहिमेचा लाभ मिळवून देण्याचे आवाहन केले आहे.

“बालकांच्या निरोगी वाढीसाठी आणि उत्तम आरोग्यासाठी जंतसंसर्गापासून संरक्षण करणे महत्त्वाचे आहे. राष्ट्रीय जंतनाशक दिनानिमित्त २७ ऑक्टोबर रोजी एक ते १९ वर्षे वयोगटातील बालके व विद्यार्थ्यांसाठी जंतनाशक मोहीम राबविण्यात येणार आहे. पालकांनी आपल्या पाल्यांना या मोहिमेचा लाभ मिळवून द्यावा,” – डॉ. विजय सूर्यवंशी, मनपा आयुक्‍त.

Pimpri: कर्तव्य बजावतानाच थांबले श्वास; अमली पदार्थ तस्कराचा पाठलाग करताना निष्ठावंत पोलिसाचा हृदयविकाराने मृत्यू