Satara: सातारा जिल्ह्यात मंगळवारी (दि. २७) राष्ट्रीय जंतनाशक मोहीम राबविण्यात येणार आहे. या मोहिमेत शहरी व ग्रामीण भागातील सर्व शासकीय, अनुदानित, विना अनुदानित, खाजगी शाळेत, आश्रमशाळेत , अंगणवाड्यात जाणाऱ्या तसेच शालाबाह्य अशा १ ते १९ वर्षे वयोगटातील एकूण ६ लाख ३१ हजार ६५६ मुला-मुलींना जंतनाशक औषध देण्याचे नियोजन करण्यात आले आहे. मुख्य दिवशी औषध घेण्यापासून वंचित राहिलेल्या पात्र लाभार्थ्यांसाठी दि. ३ नोव्हेंबर रोजी मॉप-अप दिन आयोजित करण्यात येणार आहे.

जिल्हा परिषदेच्या अध्यक्षा डॉ . प्रिया शिंदे, उपाध्यक्ष तथा आरोग्य सभापती राजू भोसले आणि मुख्य कार्यकारी अधिकारी याशनी नागराजन यांच्या मार्गदर्शनाखाली मोहिमेचे नियोजन करण्यात आले आहे. जिल्हा आरोग्य अधिकारी डॉ. महेश खलिपे, जिल्हा शल्यचिकित्सक डॉ. राहुल जाधव आणि जिल्हा माता व बाल संगोपन अधिकारी डॉ. अभिराज सूर्यवंशी यांच्या समन्वयातून आरोग्य विभाग, महिला व बाल विकास विभाग आणि शिक्षण विभाग यांच्या संयुक्त सहभागाने ही मोहीम राबविण्यात येणार आहे.

जिल्ह्यातील सर्व अंगणवाड्या, शासकीय शाळा, आश्रमशाळा, खाजगी शाळा आणि कनिष्ठ महाविद्यालयांमधील पात्र लाभार्थ्यांना वयानुसार अल्बेंडाझोल ही जंतनाशक गोळी प्रशिक्षित शिक्षक, अंगणवाडी सेविका व आरोग्य कर्मचाऱ्यांच्या प्रत्यक्ष देखरेखीखाली देण्यात येणार आहे. शालाबाह्य मुला-मुलींना आशा कार्यकर्त्यांच्या मदतीने अंगणवाडी केंद्रात आणण्याचे नियोजन करण्यात आले आहे.

जिल्हाधिकारी संतोष पाटील यांच्या अध्यक्षतेखाली जिल्हास्तरीय सुकाणू समितीच्या बैठकीत डॉ. अभिराज सूर्यवंशी यांनी मोहीमेच्या नियोजनाचे व अमंलबजावणी कृती कार्यक्रमाचे सादरीकरण केले. बैजिल्हाधिकाऱ्यांनी मोहिमेच्या संपूर्ण तयारीचा आढावा घेऊन जिल्ह्यातील एकही पात्र बालक मोहिमेपासून वंचित राहणार नाही याची दक्षता घेण्याच्या सूचना दिल्या. मुख्य कार्यकारी अधिकारी यांच्या सूचनांप्रमाणे विशेष करुन शहरी झोपडपट्ट्या, ऊसतोड कामगारांच्या वस्त्या, वीटभट्ट्या आणि स्थलांतरित कुटुंबांतील मुलांसाठी पल्स पोलिओ मोहिमेच्या धर्तीवर सूक्ष्म नियोजन करण्यावर भर देण्यात आला आहे. संबंधित विभागांनी समन्वय साधून लाभार्थ्यांचा शोध घ्यावा व त्यांना औषध घेण्यासाठी केंद्रावर आणावे, अशा सूचना देण्यात आल्या आहेत.

मातीतून प्रसारित होणाऱ्या कृमींच्या संसर्गामुळे पोषकद्रव्यांच्या शोषणावर परिणाम होऊन रक्तक्षय, कुपोषण तसेच बालकांच्या शारीरिक व बौद्धिक विकासावर विपरीत परिणाम होऊ शकतो. नियमित जंतनाशक औषधोपचारासोबत हातांची स्वच्छता, स्वच्छ पिण्याचे पाणी, शौचालयाचा वापर आणि परिसर स्वच्छता महत्त्वाची आहे. बालकांचे आरोग्य व पोषणस्थिती सुधारणे आणि त्यांच्या शिक्षण व जीवनमानाला चालना देणे हा मोहिमेचा उद्देश आहे.