Nasrapur Case – चिमुकलीवर झालेला लैंगिक अत्याचार आणि निर्घृण खून खटल्याची सुनावणी विशेष न्यायालयात अंतिम टप्प्यात आली आहे. या खटल्यामध्ये सरकारी पक्षाने आरोपीविरुद्ध अत्यंत भक्कम, शास्त्रीय आणि तांत्रिकदृष्ट्या खात्रीशीर पुरावे सादर केले आहेत. या खटल्यात आतापर्यंत ३५ साक्षीदारांची साक्ष व उलटतपासणी पूर्ण झाली असून, एकूण ५० साक्षीदारांची साक्ष नोंदवली जाण्याची शक्यता आहे.

हा खटला दुर्मिळातील दुर्मिळ श्रेणीत सिद्ध करण्यासाठी प्रयत्न सुरू असल्याचे विशेष सरकारी वकील ॲड. अजय मिसर यांनी सांगितले. नसरापूर येथील अत्याचार आणि खून प्रकरणात धक्कादायक बाबी समोर आल्या आहेत. चिमुकलीच्या तोंडात तिचीच लेगिंग्स तब्बल २१ सेंटीमीटर कोंबली होती. तिच्या छातीच्या हाडाचा वापर करून डीएनए प्रोफाइलिंग करण्यात आले आहे.

आरोपीच्या नखांखाली पीडितेची त्वचा आढळली असून, पीडितेच्या शरीरावर (हात, गाल आणि मान) आरोपीचे डीएनए अंश पॉझिटिव्ह आले आहेत, ज्याद्वारे लैंगिक अत्याचार स्पष्टपणे सिद्ध होतो, अशी माहिती ॲड. मिसर यांनी दिली. न्यायालयात आत्तापर्यंत मुलीचे आई, वडील आणि आजी, शोध घेणारे ग्रामस्थ, पीडितेला मृत्यूपूर्वी आरोपीसोबत शेवटच्या वेळी प्रत्यक्ष पाहणारे लोक यांची साक्ष झाली असून, या खटल्यामध्ये तीन लहान मुलांची साक्ष अत्यंत महत्त्वाची ठरली आहे.

आरोपीने काही काळ मुलांच्या शाळेत मजूर म्हणून काम केल्यामुळे मुले त्याला आधीपासून ओळखत होती. घटनेदिवशी चिमुकली मंदिराबाहेर खेळत असताना आरोपीने इतर मुलांना दगड मारून तेथून हुसकावून पीडित गोठ्याशेजारील शेडमध्ये नेल्याचे सीसीटीव्हीमध्ये देखील कैद झाले आहे. मुलांनी शेडच्या फटीतून पाहिले असता, मुलगी बसल्याचे त्यांनी पाहिले होते.

कोणीतरी पाहात असल्याचे लक्षात येताच आरोपीने मुलांना दगड मारले व शिवीगाळ करत बाहेर आला. घाबरलेली मुले तिथून पळाली; परंतु मुलगी शेडमध्येच असल्याने त्यांनी शेडच्या पाठीमागे जाऊन छतावर दगड मारून मोठा आवाज केला. हे दगड पोलिसांनी पंचनाम्यावेळी जप्त केले असून, लहान मुलांनी न्यायालयात दिलेली साक्ष कलम १६४ अंतर्गत न्यायालयासमोर नोंदवलेल्या जबाबाशी तंतोतंत जुळली आहे.