पुणे, {प्रभात वृत्तसेवा} – समाजातील आदर्शवत महिलांचा सन्मान व्हावा, याउद्देशाने “नारी तू नारायणी’ या कार्यक्रमाच्या माध्यमातून यंदाच्या वर्षी लाठी-काठीचे खेळ करणाऱ्या शांताबाई पवार, डॉ. मिनू अग्रवाल आणि समाजसेविका आभा भागवत यांचा सन्मान करण्यात आला.

श्री महालक्ष्मी मंदिर सारसबाग येथे झालेल्या कार्यक्रमाला ट्रस्टचे विश्वस्त आणि पदाधिकारी उपस्थित होते.

श्री महालक्ष्मी मंदिर, श्री बन्सीलाल रामनाथ अग्रवाल धार्मिक आणि सांस्कृतिक ट्रस्ट च्यावतीने आयोजित सार्वजनिक नवरात्र उत्सवात विविध क्षेत्रात उल्लेखनीय कार्य केलेल्या महिलांचा नारी तू नारायणी पुरस्कार देऊन मंदिरात सन्मान करण्यात आला.

यावेळी मंदिराचे प्रमुख संस्थापक विश्वस्त राजकुमार अग्रवाल, प्रमुख विश्वस्त अमिता अग्रवाल, विश्वस्त डॉ. तृप्ती अग्रवाल, भरत अग्रवाल, प्रविण चोरबेले, अ‍ॅड. प्रताप परदेशी, हेमंत अर्नाळकर आदी उपस्थित होते.

लाठी-काठीचे खेळ करुन ज्यांना आई-वडील नाहीत, अशा मुलांचा मी सांभाळ केला. त्या मुलांसाठी रस्त्यावर उतरले. काठ्या फिरवून मुलांचे शिक्षण केले. तब्बल २० मुलांच्या कुटुंबाचे पोट मी भरत असून, अशा सन्मानामधून या कार्यासाठी उर्जा मिळते, अशा भावना शांताबाई यांनी व्यक्त केल्या.

महिला सबलीकरणाची चर्चा सर्वत्र होत असते. नवरात्रीचा उत्सव हा महिलांचा सन्मान करणारा उत्सव असतो. त्यामुळे सर्व महिलांना सकारात्मकतेसोबत उर्जा देखील मिळते, असे डॉ. मिनू अग्रवाल म्हणाल्या. प्रत्येक माणसाला चित्र काढता येते.

महिलांना रांगोळी, मेहेंदी काढून व्यक्त होता येते. त्यामुळे सर्वांनी आपल्यामधील कला जोपासायला हवी, असा सल्ला भागवत यांनी दिला.

विविध क्षेत्रात उच्चपदावर महिला असून, अनेकजणी वेगळ्या प्रकारचे काम समाजात करत आहेत, त्यांच्या कार्याचा गौरव व्हायला हवा. गेली अनेक वर्षे मंदिरात सातत्याने हा उपक्रम राबवला जात असल्याचे डॉ. तृप्ती अग्रवाल यांनी सांगितले. चोरबेले यांनी आभार मानले.