Narendra Modi: पंतप्रधान नरेंद्र मोदींच्या बारामती दौऱ्याच्या तारखेत बदल; शरद पवारांनी दिली माहिती
Narendra Modi: दौऱ्याच्या तयारीला सुरुवात
Narendra Modi: पंतप्रधान नरेंद्र मोदी बारामती दौऱ्यावर येणार असल्याची माहिती राष्ट्रवादी काँग्रेसचे ज्येष्ठ नेते शरद पवार यांनी दिली आहे. मागील काही दिवसांपासून मोदी यांच्या या दौऱ्याची चर्चा सुरू आहे. पंतप्रधान मोदी 24 ऑक्टोबरला बारामतीला येणार होते. मात्र आता तारखेत बदल करण्यात आला आहे.
समोर आलेल्या माहितीनुसार, 3 नोव्हेंबरला रोजी पंतप्रधान मोदी विद्या प्रतिष्ठानच्या परिसरात उभारण्यात आलेल्या ‘प्रेरणास्थळा’चे उद्घाटन करणार आहेत. याशिवाय विद्या प्रतिष्ठानमध्ये उभारण्यात आलेल्या कृत्रिम बुद्धिमत्ता (एआय) संस्थेची पाहणी आणि त्याबाबतचे सादरीकरणही पंतप्रधानांसमोर होण्याची शक्यता आहे. या दौऱ्याच्या पार्श्वभूमीवर राष्ट्रवादी काँग्रेस शरदचंद्र पवार पक्षाचे अध्यक्ष शरद पवार यांनी आज माध्यमांना माहिती दिली आहे.
गौतम बुद्ध यांच्या पुतळ्याचे पंतप्रधान मोदी यांच्या हस्ते अनावरण
विद्या प्रतिष्ठानच्या नक्षत्र उद्यानात उभारण्यात आलेल्या गौतम बुद्ध यांच्या पुतळ्याचे पंतप्रधान मोदी यांच्या हस्ते अनावरण होणार आहे. या परिसरात विविध महापुरुषांच्या कार्याची आणि विचारांची माहिती देणारी चित्रे लावण्यात आली असून, या कार्यक्रमासाठी अनेक मान्यवरांना निमंत्रण देण्यात आल्याची माहिती शरद पवार यांनी दिली. 3 नोव्हेंबरला मोदी बारामतीत येतील. 10 वाजता सकाळी विमानतळवरती येतील. त्यानंतर विद्या प्रतिष्ठान येथे येतील, अशी माहिती शरद पवारांनी दिली आहे.
विद्या प्रतिष्ठानमध्ये प्रेरणास्थळ येथे भगवान गौतम बुद्धांचा ४ टन वजनाचा पुतळा बसवला आहे. याशिवाय राजमाता जिजाऊ, छत्रपती शिवाजी महाराज, अहिल्यादेवी होळकर, महात्मा फुले, सावित्रीबाई फुले, सयाजीराव गायकवाड, राजर्षी शाहू महाराज, महात्मा गांधी, डाॅ. बाबासाहेब आंबेडकर, कर्मवीर भाऊराव पाटील, अण्णा भाऊ साठे, यशवंतराव चव्हाण, शारदाबाई पवार यांच्या पेंटींग आहेत.
प्रेरणास्थळ उदघाटन व बुद्धांच्या पुतळ्याचे अनावरण त्यांच्या हस्ते होईल. यावेळी ते एआय विद्यार्थ्यांना मार्गदर्शन करणार असून नंतर ते मुख्य कार्यक्रमात सहभागी होतील. मुख्य कार्यक्रम ११.४५ वाजता विद्या प्रतिष्ठानच्या मैदानात सुरु होणार असल्याचे पवार यांनी सांगितले.
यावेळी राज्यपालांसह मुख्यमंत्री देवेंद्र फडणवीस, उपमुख्यमंत्री सुनेत्रा पवार, एकनाथ शिंदे, मायक्रोसाॅफ्ट व आॅक्सफर्डचे प्रमुख, गेटस फाऊंडेशन, सायरस पुनावारा, बाबा कल्याणी, अतुल चोरडीया, नीलकंठ छाब्रीया, विवेक सावंत, अनिल काकोडकर, सुप्रिया सुळे, पार्थ पवार आदींची उपस्थिती असेल. दरम्यान, पंतप्रधानांच्या बारामती भेटीची माहिती निश्चित होताच दौऱ्याच्या तयारीला सुरुवात झाली आहे.
हेही वाचा:
