Nanded Lok Sabha By Election 2024 : नांदेड लोकसभा पोटनिवडणुकीसाठी 20 नोव्हेंबरला मतदान होणार असून 23 नोव्हेंबरला निकाल जाहीर होणार आहेत. याठिकाणी काँग्रेसकडून रवींद्र चव्हाण यांना उमेदवारी जाहीर केली आहे. येथे भाजप माजी मुख्यमंत्री रिंगणात उतरवण्याची चाचपणी करत आहे. अशोक चव्हाण काही महिन्यांपूर्वी काँग्रेसमधून भाजपमध्ये आले आहेत. त्यांनी महाराष्ट्राचे उपमुख्यमंत्रीपद भूषविलेले आहे. त्यामुळे येथे चव्हाण यांना उमेदवारी दिल्यास जागा भाजपकडे येण्याची आशा पक्षाला वाटत आहे. महाराष्ट्राच्या विधानसभा निवडणुकीसोबत केंद्रीय निवडणूक आयोगाने नांदेड लोकसभा मतदारसंघाच्या पोटनिवडणुकीची घोषणा केली आहे. काँग्रेस खासदार वसंतराव चव्हाण यांच्या निधनामुळे नांदेडची जागा रिक्त झाली आहे. काँग्रेसने या जागेवर वसंतराव चव्हाण यांचा मुलगा रवींद्र चव्हाण यांना उमेदवारी दिली आहे. दुसरीकडे एमआयएमचे नेते माजी खासदार इम्तियाज जलील यांनी देखील नांदेडमधून पोटनिवडणूक लढवणार असल्याची घोषणा केली आहे. त्यानंतर आता भाजप अशोक चव्हाण यांना उमेदवारी जाहीर करण्याची शक्यता आहे. काँग्रेसची जागा भाजपकडे येणार? लोकसभा निवडणुकीत काँग्रेसने ही जागा भाजपच्या ताब्यातून मिळवली होती. काँग्रेसच्या वसंतराव चव्हाण यांनी भाजपचे तत्कालीन खासदार प्रताप पाटील चिखलीकर यांचा पराभव केला होता. वसंतराव चव्हाण यांना 528894 मते मिळाली होती. तर, प्रताप पाटील चिखलीकर यांना 469452 मते मिळाली होती. वसंतराव चव्हाण यांनी नांदेड उत्तर, नांदेड दक्षिण, नायगाव आणि देगलूर या मतदारसंघात आघाडी घेतली होती. तर, प्रताप पाटील चिखलीकर यांना भोकर आणि मुखेडमध्ये आघाडी मिळाली होती. अशोक चव्हाण हे भाजपमध्ये असून देखील काँग्रेसने नांदेडची जागा जिंकली होती. मात्र, 26 ऑगस्ट 2024 रोजी निधन झाले. यामुळे ही जागा रिक्त झाली. अशोक चव्हाण यांचा नांदेडमध्ये मोठा जनसंपर्क आहे. ते महाराष्ट्राचे मुख्यमंत्री राहिलेले आहेत. त्यामुळे येथील जागा आता भाजपकडे येणार का हे पहावे लागणार आहे. भाजपकडून अशोक चव्हाण यांच्या नावाची चाचपणी – माजी मुख्यमंत्री आणि राज्यसभा खासदार अशोक चव्हाण सध्या भाजपमध्ये आहेत. अशोक चव्हाण यांनी या मतदारसंघाचं प्रतिनिधीत्व 2014 मध्ये केलं होतं. अशोक चव्हाण यांना 2019 च्या लोकसभा निवडणुकीत भाजपच्या प्रताप पाटील चिखलीकर यांच्याकडून पराभव स्वीकारावा लागला होता. अशोक चव्हाण यांना असलेला अनुभव पाहता भाजपकडून नांदेड लोकसभा मतदारसंघाच्या पोटनिवडणुकीसाठी त्यांच्या नावाची चाचपणी करण्यात येत असल्याची माहिती आहे. असा आहे नांदेड लोकसभा निवडणुकीचा कार्यक्रम – निवडणुकीचं नोटिफिकेशन: 22 ऑक्टोबर 2024 अर्ज दाखल करण्याची शेवटची तारीख: 29 ऑक्टोबर अर्जांची तपासणी : 30 ऑक्टोबर 2024 अर्ज मागं घेण्याची तारीख : 4 नोव्हेंबर मतदान : 20 नोव्हेंबर 2024 मतमोजणी : 23 नोव्हेंबर 2024 निवडणूक प्रक्रिया समाप्त: 25 नोव्हेंबर 2024
