राहुरी : महात्मा फुले कृषि विद्यापीठातील जागतिक बँक अर्थसहाय्यीत राष्ट्रीय कृषी उच्च शिक्षण प्रकल्पांतर्गत हवामान अद्ययावत शेती व जल व्यवस्थापनाचे आधुनिक कृषि विज्ञान व तंत्रज्ञान प्रकल्पांतर्गत कुलगुरु डॉ. पी.जी. पाटील यांच्या मार्गदर्शनाखाली पुणे येथे दि. 20, 21 डिसेंबर रोजी भविष्यातील शेती या विषयावर आंतरराष्ट्रीय संमेलनाचे आयोजन करण्यात आलेले आहे.

या आंतरराष्ट्रीय संमेलनात एक आंतरराष्ट्रीय परिषद व पाच आंतरराष्ट्रीय परिसंवाद होणार आहेत. या आंतरराष्ट्रीय संमेलनात आधुनिक कृषि तंत्रज्ञान या विषयावर आंतरराष्ट्रीय परिषद आणि कृषिमध्ये ड्रोनचा वापर, कृषिमध्ये कृत्रिम बुध्दीमत्ता व हायपरस्पेक्ट्रल इमेजेस, इंडोर फार्मिंग, कृषिमध्ये यंत्रमानवाचा उपयोग, कृषिमध्ये आयओटीचा वापर या पाच विषयांवर परिसंवाद होणार आहेत.

या संमेलनाचा उद्देश म्हणजे विद्यार्थी, शास्त्रज्ञ, शेतकरी, नवोद्योजक यांना आधुनिक तंत्रज्ञानाची ओळख करुन देणे, जगात सुरू असलेल्या तंत्रज्ञानातील बदल अवगत करुन देणे, नवीन तंत्रज्ञानाचा कार्यक्षम वापर, शेतीत होत असलेल्या वेगवान तंत्रज्ञान बदलामधील धोरणे, पर्यावरण पूरक तंत्रज्ञानाची ओळख करुन देणे हा आहे.

या परिसंवादांमध्ये संबंधित विषयानुसार तज्ज्ञ आपले संशोधन सादर करणार आहेत. आंतरराष्ट्रीय संमेलनात विद्यार्थी, शास्त्रज्ञ, प्राध्यापक, उद्योजक, नवोद्योजक सहभागी होऊन आपले संशोधनपर लेख सादर करू शकतील. उत्कृष्ट सादरीकरणास प्रमाणपत्र देवून सन्मानित करण्यात येणार आहे.