Samruddhi Mahamarg |  समृद्धी महामार्गाचा अंतिम अर्थात चौथ्या टप्प्याचे लोकार्पण आज मुख्यमंत्री देवेंद्र फडणवीस यांच्या हस्ते होणार आहे. विदर्भ, मराठवाडा आणि उत्तर महाराष्ट्रातील 24 जिल्ह्यांच्या विकासाला चालना देणारा समृद्धी महामार्ग हा सरकारचा महत्त्वाकांक्षी प्रकल्प आहे.

समृद्धी महामार्गाचा हा अंतिम टप्पा वाहतुकीसाठी खुला होणार आहे. त्यामुळे नागपूर ते मुंबई 701 किलोमीटरचा प्रवास सुसाट होणार असून नागपूरहून 8 तासांत ठाण्यात पोहोचता येईल. मुख्यमंत्री देवेंद्र फडणवीस यांच्या उपस्थितीत आज इगतपुरी येथे अंतिम टप्प्याचा लोकार्पण सोहळा होईल.

मुख्यमंत्री देवेंद्र फडणवीस यांच्यासह उपमुख्यमंत्री एकनाथ शिंदे, अन्न व नागरी पुरवठामंत्री छगन भुजबळ, कृषिमंत्री माणिकराव कोकाटे, अन्न व औषध प्रशासनमंत्री नरहरी झिरवाळ, शिक्षणमंत्री दादा भुसे यांच्या प्रमुख उपस्थितीत समृद्धी महामार्गाचा लोकार्पण सोहळा होईल.

पहिल्या टप्प्यानंतर अडीच वर्षांनी संपूर्ण महामार्ग होणार सुरू 

नागपूर ते शिर्डी या ५२० किलोमीटर लांबीच्या पहिल्या टप्प्याचे लोकार्पण पंतप्रधान नरेंद्र मोदी यांच्या हस्ते ११ डिसेंबर २०२२ रोजी झाले होते, तर समृद्धी महामार्गाच्या अहिल्यानगर जिल्ह्यातील शिर्डी (कोकणमठाण) ते नाशिक जिल्ह्यातील भरवीर इंटरचेंजदरम्यान दुसऱ्या टप्प्यातील ८० कि.मी. लांबीचे लोकार्पण २६ मे २०२३ रोजी तत्कालीन मुख्यमंत्री एकनाथ शिंदे यांच्या हस्ते झाले. Samruddhi Mahamarg |

समृद्धी महामार्गाच्या भरवीर इंटरचेंज ते इगतपुरीपर्यंतच्या २५ कि.मी.च्या तिसऱ्या टप्प्याचे लोकार्पण ४ मार्च २०२४ रोजी सार्वजनिक बांधकाम (सार्वजनिक उपक्रम) मंत्री दादा भुसे यांच्या हस्ते झाले होते. तर आता समृद्धी महामार्गाची उर्वरित ७६ कि.मी. लांबीचे (इगतपुरी ते आमणे) लोकार्पण आज मुख्यमंत्री देवेंद्र फडणवीस करतील. पहिल्या टप्प्यानंतर आता अडीच वर्षांनी संपूर्ण महामार्ग सेवेत येत आहे.

नागपूरहून मुंबईत 8 तासांत पोहोचता येणार 

एकूण 701 किमीपैकी 625 किमी लांबीचा महामार्गावरून सध्या वाहतूकीसाठी सुरू आहे. आता या महामार्गाचा उर्वरित 76 किमी लांबीचा मार्ग (इगतपुरी ते आमणे) वाहतुकीस खुला होणार आहे. त्यामुळे नागपूरहून मुंबईच्या वेशीवर 120 किमी वेगाने 8 तासांत पोहोचता येईल. Samruddhi Mahamarg |

76 किमीच्या या मार्गावर 5 बोगदे आहेत. त्यांची एकत्रित लांबी 11 किमी आहे. यामध्ये इगतपुर येथील महाराष्ट्रातील सर्वात लांबीचा 7.78 किमी बोगद्याचा देखील समावेश आहे.  दरम्यान, जुन्या नागपूर-मुंबई मार्गावरून नागपूरहून मुंबईकडे येण्यास १७-१८ तास लागतात. नवीन ग्रीनफिल्ड एक्स्प्रेस वेने हा प्रवास 8 तासांत पार करता येणार आहे.

हेही वाचा :  

‘…तर मी राजकारण सोडून देईन’; सुधाकर बडगुजरांचा थेट ठाकरे गटाला इशारा