Mumbai ATS : महाराष्ट्र दहशतवाद विरोधी पथकाने (एटीएस) बंदी घातलेल्या दहशतवादी संघटनांचा ऑनलाइन प्रचार केल्याच्या आरोपाखाली एका अभियांत्रिकीच्या विद्यार्थ्याला अटक केली आहे. अयान शेख असे या विद्यार्थ्याचे नाव असून, तो जैश-ए-मोहम्मद आणि आयसिस (आयएसआयएस) सारख्या संघटनांच्या संपर्कात असल्याचे तपासात उघड झाले आहे. एटीएसने मुंबईतील कुर्ला, गोवंडी आणि शिवाजी नगर भागात शोधमोहीम राबवून ही कारवाई केली. शेखच्या लॅपटॉप आणि मोबाईलमध्ये मसूद अझहरशी संबंधित ऑडिओ-व्हिडिओ क्लिप्स आणि दहशतवादी भरतीशी संबंधित चॅट्स आढळल्या आहेत. तो टेलिग्राम आणि एन्क्रिप्टेड प्लॅटफॉर्मवरून अतिरेकी साहित्य प्रसारित करत होता. त्याने आपल्या काही मित्रांनाही या गटांमध्ये जोडून त्यांचे कट्टरपंथीय विचार बनवण्याचा प्रयत्न केला होता. आरोपी अयान शेख हा परदेशी हँडलर्सच्या संपर्कात होता का आणि त्याने अतिरेकी कारवायांसाठी निधी गोळा केला होता का, याचा तपास एटीएस करत आहे.
