प्रभात वृत्तसेवा
पौड – मुळशी तालुक्यातील पौड-अंबडवेट जिल्हा परिषद गट मागील दोन निवडणुकीत शिवसेनेने जिंकला असून यंदा या गटावर सर्वच प्रमुख पक्षांनी डोळा ठेवला आहे. यावेळी हा गट नागरिकांचा मागास प्रवर्ग (ओबीसी) या वर्गासाठी आरक्षित झाल्याने उमेदवारीसाठी मोठी चढाओढ होताना दिसत आहे.आरक्षण जाहीर झाल्यानंतर इच्छुकांनी जनसंपर्क मोहीमेला वेग दिला आहे. पहाटे विठ्ठल मंदिरातील काकड आरतीपासून, महिलांसाठी साडी वाटप, वारकर्‍यांसाठी दर्शन व्यवस्था, भाऊबीज निमित्त बक्षीस वितरण, तसेच खेळ रंगला वारकर्‍यांचा यांसारख्या कार्यक्रमांतून इच्छुक उमेदवार आपली लोकप्रियता वाढवण्याचा प्रयत्न करत आहेत.

गेल्या काही महिन्यांपासूनच पौड-अंबडवेट गटात विविध कार्यक्रमांमुळे राजकीय वातावरण तापले आहे. इतर गट शांत असताना या गटातील कार्यकर्त्यांनी जनसंपर्काचे विविध प्रयोग राबवले आहेत. त्यामुळे या गटाकडे सर्वांचे लक्ष लागले आहे. येत्या काही दिवसांत पक्षांतर्गत चर्चेनंतर अधिकृत उमेदवारी अर्ज दाखल होणार असून कोणाला अंतिम संधी मिळते, याकडे संपूर्ण मुळशी तालुक्याचे लक्ष लागले आहे.

इच्छुक उमेदवारांची काकड आरतीला हजेरी..
कोजागिरी पौर्णिमा नंतर सर्व गावात काकड आरती सुरू झाली असून येणार्‍या जिल्हा परिषद व पंचायत समिती निवडणुकी चे पडसाद सुरू झाले असून दरम्यान, काकड आरतीला सकाळी लवकर मंदिरात विठ्ठलाच्या काकड आरती करिता येणार्‍या नागरिकांमध्ये आपली उपस्थिती ठसवण्यासाठी इच्छुक उमेदवार मोठ्या संख्येने हजेरी लावत आहेत. या वेळी उमेदवारांच्या मनात देवा, यावेळी मलाच उमेदवारी मिळू दे; निवडून आलो की तुला सोन्याची टोपी घालीन! अशी साद तर विठ्ठलाला घालत नसेल ना, अशी विनोदी चर्चा मात्र नागरिकांमध्ये रंगली आहे.

पौड-अंबडवेट गटातील संभाव्य उमेदवार..
-शिवसेना (उबाठा) – पश्चिम महाराष्ट्र युवासेना विभागीय सचिव अविनाश बलकवडे, तालुकाप्रमुख सचिन खैरे, सहसंपर्क  संघटिका स्वाती ढमाले.
-राष्ट्रवादी काँग्रेस – माजी सभापती रवींद्र कंधारे, युवानेते मिलिंद वाळुंज, अंबडवेटचे माजी सरपंच किसन नागरे.
-भाजप – जिल्हा नियोजन समितीचे माजी सदस्य अमित कंधारे
-राष्ट्रवादी काँग्रेस (शरदचंद्र पवार गट) – माजी सभापती कोमल वाशिवले
-आरपीआय (आठवले) – युवानेते विशाल शेळके
-काँग्रेस -सचिन किर्वे