Mulshi Panchayat Samiti – मुळशी पंचायत समितीच्या सभापतीपदी राष्ट्रवादी काँग्रेस (अजित पवार) मंदा बाबाजी शेळके यांची तर उपसभापतीपदी राष्ट्रवादी काँग्रेसचे (शरदचंद्र पवार पक्ष) दगडू नामदेव करंजावणे यांची बिनविरोध निवड झाली. पंचायत समितीच्या सेनापती बापट सभागृहात पार पडलेल्या बैठकीत ही निवड जाहीर करण्यात आली. पंचायत समितीच्या निवडणुकीत राष्ट्रवादी काँग्रेस कडून पौड गणातून काजल मोरे, अंबडवेट गणातून प्रविण धनवे आणि माण गणातून मंदा शेळके हे सदस्य विजयी झाले होते. तर राष्ट्रवादी काँग्रेस (शरदचंद्र पवार) कडून भूगाव गणातून दगडू करंजावणे व पिरंगुट गणातून राहूल पवळे हे निवडून आले होते. हिंजवडी गणातून भाजपाच्या ऐश्वर्या वाघमारे यांनी विजय मिळविला होता. सभापतीपद सर्वसाधारण प्रवर्गातील महिलेसाठी राखीव होते. पक्षीय बलाबल पाहता राष्ट्रवादी काँग्रेसकडे तीन सदस्य असल्याने काठावरचे बहुमत होते. बहुमतासाठी आणखी एका मताची आवश्यकता असल्याने सभापती-उपसभापती निवडीपूर्वी दोन्ही राष्ट्रवादी गट आणि भाजपामध्ये गुप्त बैठकींचा सिलसिला सुरू होता. चिठ्ठी टाकण्याची वेळ येते की काय, अशा चर्चाही राजकीय वर्तुळात रंगल्या होत्या. दरम्यान, आमदार शंकर मांडेकर आणि राष्ट्रवादी शरदचंद्र पवार पक्षाचे तालुकाध्यक्ष महादेव कोंढरे यांच्या मध्यस्थीने दोन्ही राष्ट्रवादी गटांमध्ये एकमत झाले. त्यानुसार उपसभापतीपद दगडू करंजावणे यांना आणि सभापतीपद मंदा शेळके यांना देण्याचे ठरले निवडणूक निर्णय अधिकारी विठ्ठल उदमल यांनी शेळके व करंजावणे यांच्या निवडीची घोषणा केली. जिल्हा परिषदेचे माजी उपाध्यक्ष शुक्राचार्य वांजळे राष्ट्रवादीकडून निरीक्षक म्हणून उपस्थित होते. निवडीनंतर आमदार मांडेकर यांच्या हस्ते दोघांचाही सभागृहात सत्कार करण्यात आला. वाजतगाजत दोघांची पौड एसटी स्थानकापर्यंत मिरवणूक काढण्यात आली. गुलालाची उधळण आणि फटाक्यांच्या आतषबाजीत कार्यकर्त्यांनी आनंदोत्सव साजरा केला.
