Mulshi Cyber Fraud – शेअर बाजारात भरघोस परतावा मिळवून देण्याचे आमिष दाखवत सायबर भामट्यांनी मुळशी तालुक्यातील एका पोलीस पाटलाची तब्बल 56 लाख 24 हजार 999 रुपयांची ऑनलाइन फसवणूक केल्याचा धक्कादायक प्रकार उघडकीस आला आहे. इन्स्टाग्रामवरील जाहिरातीपासून सुरू झालेला हा फसवणुकीचा डाव व्हॉट्सअ‍ॅप ग्रुप, बनावट ट्रेडिंग अ‍ॅप आणि खोट्या नफ्याच्या आकड्यांपर्यंत पोहोचला.

याप्रकरणी पौड पोलीस ठाण्यात गुन्हा दाखल करण्यात आला आहे. संबंधित पोलीस पाटील शेतीबरोबरच शेअर बाजारातही गुंतवणूक करत होते. 26 नोव्हेंबर 2025 रोजी त्यांनी इन्स्टाग्रामवर ’व्हेन्चुरा सिक्युरिटी लिमिटेड’ या नावाची गुंतवणुकीची जाहिरात पाहिली. अधिक माहितीसाठी त्यांनी आपला मोबाईल क्रमांक दिल्यानंतर व्हॉट्सअ‍ॅपवर संपर्क साधून आकर्षक परताव्याचे आमिष दाखवण्यात आले.

त्यानंतर त्यांना ’व्हेन्चुरा सिक्युरिटीज लिमिटेड क्लब-113’ या व्हॉट्सअ‍ॅप ग्रुपमध्ये सहभागी करण्यात आले. ’सिया’ नावाने संपर्क करणार्‍या महिलेने एक ट्रेडिंग अ‍ॅप डाउनलोड करून त्यावर खाते उघडण्यास सांगितले. सुरुवातीला कमी रकमेची गुंतवणूक करून त्यावर सुमारे दहा टक्के नफा झाल्याचे अ‍ॅपमध्ये दाखवण्यात आल्याने फिर्यादींचा विश्वास बसला. यानंतर आरोपींनी वेगवेगळ्या बँक खात्यांमध्ये आणि गुगल पेद्वारे रक्कम जमा करण्यास सांगितले.

मोठे आयपीओ कमी किमतीत उपलब्ध करून देण्याचे आमिष दाखवत त्यांनी अधिकाधिक गुंतवणूक करण्यास प्रवृत्त केले. अ‍ॅपवर गुंतवणुकीची रक्कम सातत्याने वाढत असल्याचे दाखवण्यात आले. काही दिवसांतच गुंतवणुकीचे मूल्य तब्बल 10 कोटी 90 लाख रुपये झाल्याचे अ‍ॅपमध्ये दिसू लागल्याने फिर्यादींनी आणखी मोठी रक्कम गुंतवली.

27 नोव्हेंबर 2025 ते 2 जानेवारी 2026 या कालावधीत त्यांनी आरोपींनी सांगितलेल्या विविध बँक खात्यांमध्ये आणि गुगल पेद्वारे एकूण 56 लाख 24 हजार 999 रुपये ऑनलाइन हस्तांतरित केले; मात्र गुंतवणुकीची रक्कम परत मागितल्यानंतर आरोपींनी पैसे काढण्यासाठी आणखी 30 लाख रुपये ’सिक्युरिटी डिपॉझिट’ म्हणून भरण्याची अट घातली.

फिर्यादींनी अ‍ॅपमध्ये दिसत असलेल्या नफ्यातून ती रक्कम वजा करून उर्वरित पैसे देण्याची विनंती केली. मात्र, अतिरिक्त रक्कम भरल्याशिवाय कोणतीही रक्कम मिळणार नसल्याचे सांगत आरोपींनी टाळाटाळ केली. त्यानंतर आपली फसवणूक झाल्याचे फिर्यादींच्या लक्षात आले. फसवणुकीची खात्री झाल्यानंतर त्यांनी 6, 7 आणि 8 जानेवारी 2026 रोजी 1930 राष्ट्रीय सायबर हेल्पलाइनवर तक्रार नोंदवली.

त्यानंतर पौड पोलीस ठाण्यात फिर्याद दाखल करण्यात आली. याप्रकरणी ’सिया’ नावाने संपर्क करणारी महिला, व्हॉट्सअ‍ॅप ग्रुपचा प्रशासक, सुरुवातीला संपर्क करणारा अज्ञात व्यक्ती तसेच व्यवहारासाठी वापरण्यात आलेल्या विविध बँक खातेदारांविरुद्ध ऑनलाइन आर्थिक फसवणुकीचा गुन्हा दाखल करण्यात आला असून पौड पोलीस पुढील तपास करत आहेत.