Shirur Taluka :  केंदूर – शिरूर तालुक्यातील मुखई येथे स्प्रिंकलरच्या पाइपलाइनमध्ये अज्ञात व्यक्तीने घातक तणनाशक मिसळल्याचा संशय व्यक्त करण्यात आला आहे. यामुळे भाऊसाहेब बाबासाहेब येवले यांच्या दीड एकर क्षेत्रातील मेथीचे पीक करपण्यास सुरुवात झाली आहे. या घटनेत सुमारे दोन ते अडीच लाख रुपयांचे नुकसान झाल्याचे येवले यांनी सांगितले.

येवले यांनी २ ऑक्टोबर रोजी दीड एकर क्षेत्रात ७० किलो मेथी बियाण्याची पेरणी केली होती. १९ ऑक्टोबर रोजी सायंकाळी ६.३० नंतर पाइपलाइनमध्ये तणनाशक मिसळल्याचा त्यांचा संशय आहे. दुसऱ्या दिवशी स्प्रिंकलरने पाणी दिल्यानंतर हे रसायन संपूर्ण शेतात पसरल्याची शक्यता आहे.

दोन दिवसांनंतर पिकाची पाने जळून करपण्यास सुरुवात झाली. हा प्रकार लक्षात आल्यानंतर येवले यांनी पोलिसांच्या आपत्कालीन क्रमांकावर संपर्क साधून तक्रार दाखल केली.

आणखी १५ दिवसांत पीक काढणीला येणार होते. मात्र, या घटनेमुळे शेतकऱ्याच्या हातातोंडाशी आलेले पीक वाया जाण्याची भीती आहे. आधीच दुष्काळी परिस्थितीमुळे आर्थिक संकटाचा सामना करणाऱ्या शेतकऱ्याला या घटनेचा मोठा फटका बसला आहे.

पाइपलाइनमध्ये कोणते रसायन मिसळले, हा प्रकार कोणी केला आणि त्यामागील उद्देश काय होता, याची सखोल चौकशी करावी. दोषींवर कठोर कारवाई करावी, अशी मागणी येवले यांनी केली आहे.