राजगुरूनगर : खेड तालुक्यातील पांगरी येथे आयोजित करण्यात आलेल्या भव्य ‘आमदार केसरी 20-20’ बैलगाडा शर्यतीत पाच दिवसांत तब्बल 740 बैलगाड्यांनी सहभाग घेतला. या स्पर्धेत पांडुरंग किसनराव काळे यांच्या बैलगाड्याने अंतिम फेरीत 10.88 सेकंदांची वेळ नोंदवत प्रथम क्रमांक पटकावला. त्यांच्या बैलगाड्याने बैलगाडाप्रेमींची मने जिंकली.

खेड तालुक्यातील बैलगाडा चालक, मालक आणि शेतकरी यांच्या वतीने या स्पर्धेचे आयोजन करण्यात आले होते. अंतिम फेरीप्रसंगी खेडचे आमदार बाबाजी काळे यांनी बैलगाडा घाटाला भेट देऊन चालक, मालक आणि उपस्थित बैलगाडाप्रेमींशी संवाद साधला. खेड तालुक्यातील शेतकर्‍यांच्या पाणीप्रश्नावर शासनस्तरावर प्रयत्न सुरू असल्याचे त्यांनी सांगितले. गेल्या चार-पाच दिवसांपासून सुरू असलेल्या या स्पर्धेला शेतकरी, युवक, ज्येष्ठ नागरिक आणि बैलगाडाप्रेमींचा मोठा प्रतिसाद मिळाला. अशा स्पर्धांमुळे ग्रामीण भागातील पारंपरिक संस्कृती जपली जाते. तसेच स्थानिक व्यापारी, छोटे व्यावसायिक आणि अन्य घटकांनाही आर्थिक लाभ होतो. स्पर्धेतील बक्षिसांचा लाभही शेतकरी कुटुंबांना मिळतो, असे आमदार काळे यांनी नमूद केले. स्पर्धेचे उत्कृष्ट नियोजन केल्याबद्दल त्यांनी आयोजकांचे अभिनंदन केले.

या वेळी पंचायत समिती सभापती गौरी मुर्‍हे, उपसभापती दिलीप दुबे, माजी उपसभापती मंगेश सावंत, जिल्हा परिषद सदस्य दीप्ती भोगाडे, गणेश आरगडे, ज्योतीताई आरगडे, पंचायत समिती सदस्य सारिका गोगावले, कविता राक्षे, बाजार समितीचे सभापती अशोक राक्षे, भाजप नेत्या प्रिया पवार, शिवसेनेचे जिल्हाप्रमुख भगवानशेठ पोखरकर, राजगुरुनगर सहकारी बँकेचे माजी अध्यक्ष राहुल तांबे पाटील, खरेदी-विक्री संघाचे अध्यक्ष नरेंद्र थिगळे, एल. बी. तनपुरे, हिरामण सातकर, जयराम पाचारणे आणि विशाल थिगळे यांच्यासह विविध क्षेत्रांतील मान्यवर, पदाधिकारी, बैलगाडामालक, शेतकरी व बैलगाडाप्रेमी उपस्थित होते. या स्पर्धेचे संयोजन काळेचवाडी, पांगरी, बुट्टेवाडी व पाडळी येथील आजी-माजी पदाधिकारी, ग्रामस्थ तसेच आमदार बाबाजी रामचंद्र काळे युवा मंच, खेड तालुका यांच्या वतीने करण्यात आले.

‘आमदार केसरी’ बैलगाडा शर्यतीतील विजेते
प्रथम क्रमांक : पांडुरंग किसनराव काळे – बुलेट दुचाकी.
द्वितीय क्रमांक : बबनशेठ दगडू डावरे व ज्ञानेश्वर सातपुते – शाईन दुचाकी.
तृतीय क्रमांक : सचिनशेठ सोनवणे – स्प्लेंडर दुचाकी.
चतुर्थ क्रमांक : सुभेदार ज्ञानेश्वर संभाजीराळे व गणेशनाना आरगडे – स्प्लेंडर दुचाकी.
पंचम क्रमांक : स्वर्गीय दयानंद भाऊ येळवंडे व सचिन भाऊ साऊंड सर्व्हिस – स्प्लेंडर दुचाकी.
षष्ठम क्रमांक : आसिफभाई मुबारक मुलाणी व नरहरीशेठ बालघरे – डीलक्स दुचाकी.