MSRTC Strike Satara – महाराष्ट्र एसटी संयुक्त कृती समिती, सातारा विभागाच्यावतीने प्रलंबित वेतनवाढ, महागाई भत्ता, वेतनवाढीच्या दराची थकबाकी तसेच विविध आर्थिक मागण्यांसाठी सोमवारी सातारा विभागीय कार्यालयासह जिल्ह्यातील सर्व आगारांमध्ये घंटानाद व महाआरती आंदोलन करण्यात आले. राज्यभरातील एसटीच्या विविध युनिटमध्येही हे आंदोलन एकाचवेळी पार पडले. सकाळी 11 वाजता एसटी कर्मचार्‍यांनी एकत्रितपणे घंटानाद करून सरकारचे लक्ष वेधण्याचा प्रयत्न केला. त्यानंतर सरकारला सद्बुद्धी मिळावी आणि कामगारांच्या मागण्यांबाबत सकारात्मक निर्णय घ्यावा, या उद्देशाने महाआरती करण्यात आली.

आंदोलनानंतर सातारा विभाग नियंत्रक ज्योती गायकवाड यांना निवेदनाची प्रत देण्यात आली. तसेच संयुक्त कृती समितीच्यावतीने जिल्हाधिकारी संतोष चंद्रकांत पाटील यांनाही मागण्यांचे निवेदन सादर करण्यात आले. एसटी कर्मचार्‍यांना राज्य सरकारी कर्मचार्‍यांप्रमाणे वेतन लागू करणे, कॅशलेस मेडिक्लेम सुविधा उपलब्ध करून देणे, 2016 पासून कमी करण्यात आलेला वेतनवाढीचा दर पुन्हा 3 टक्के करणे, घरभाडे भत्ता 10, 20 व 30 टक्के दराने लागू करून थकबाकी अदा करणे, महागाई भत्त्याची थकबाकी देणे, एसटी महामंडळासाठी अर्थसंकल्पात स्वतंत्र तरतूद करणे आदी प्रमुख मागण्या यावेळी करण्यात आल्या.

‘महाराष्ट्र एसटी संयुक्त कृती समितीचा विजय असो’, ‘कामगार एकजुटीचा विजय असो’ आणि ‘आमच्या मागण्या मान्य करा’ अशा घोषणांनी बसस्थानक परिसर दणाणून गेला. आमच्या संयमाचा अंत पाहू नका असा इशारा देत कृती समितीने आंदोलन अधिक तीव्र करण्याचा निर्धार व्यक्त केला. कृती समितीने आंदोलनाचे पुढील टप्पेही जाहीर केले असून, 22 जून रोजी प्रचंड द्वारसभा आणि 29 जूनपासून बेमुदत धरणे आंदोलन करण्यात येणार असल्याचे सांगितले. मागण्यांवर समाधानकारक निर्णय न झाल्यास आंदोलन अधिक तीव्र करण्याचा इशाराही यावेळी देण्यात आला.