प्रभात वृत्तसेवा पुणे – राज्य मार्ग परिवहन महामंडळाच्या (एसटी) सुरक्षा व दक्षता विभागाच्या मुख्य सुरक्षा व दक्षता अधिकारी या पदावर लवकरच भारतीय पोलीस सेवेतील (आयपीएस) पोलीस अधिकाऱ्याची नियुक्ती करण्यात येणार आहे. या पदावर आयपीएस अधिकारी नेमण्यास गृह विभागाने मंजुरी दिल्याची माहिती परिवहन मंत्री आणि एसटी महामंडळाचे अध्यक्ष प्रताप सरनाईक यांनी दिली.फेब्रुवारी २०२५ मध्ये पुण्यातील स्वारगेट आगारामध्ये घडलेल्या महिला अत्याचाराने संपूर्ण राज्य हादरले होते. त्या पार्श्वभूमीवर एसटीच्या सुरक्षा यंत्रणेतील ढिसाळपणा उघड झाला. तसेच एसटीचे मुख्य सुरक्षा व दक्षता अधिकारी हे पद वर्षानुवर्षे रिक्त असल्याचे समोर आले. त्यावेळी परिवहन मंत्री प्रताप सरनाईक यांनी विधिमंडळात एसटीला आयपीएस दर्जाचा अधिकारी मिळेल, असे आश्वासन दिले होते. त्याची पूर्तता प्रत्यक्षात येत असून, एसटी महामंडळाच्या पाठपुराव्याला गृह खात्याने हिरवा कंदील दाखवला आहे. मुख्यमंत्र्यांनी या नियुक्तीस मान्यता दिल्याने, लवकरच एसटीच्या सुरक्षा विभागाला अनुभवी आयपीएस अधिकारी प्रमुख म्हणून मिळणार आहे.
