MS Dhoni IPL : “…म्हणून खेळणार नाही!”; धोनीने थेट मित्रालाच सांगितला मोठा निर्णय; IPL 2027 पूर्वी बद्रीनाथचा खळबळजनक दावा
MS Dhoni IPL : सीएसकेचा माजी खेळाडू एस. बद्रीनाथने धोनीच्या भूमिकेबाबत एक मोठा आणि धक्कादायक खुलासा केला आहे.
MS Dhoni Will Not Play As Impact Player In IPL 2027 S Badrinath Reveals CSK Knee Injury : आयपीएल २०२६ च्या संपूर्ण हंगामात गुडघ्याच्या दुखापतीमुळे सीएसकेचा माजी कर्णधार महेंद्रसिंग धोनी (MS Dhoni) एकही सामना खेळू शकला नव्हता. अवघ्या ६ महिन्यांवर येऊन ठेपलेल्या आयपीएल २०२७ मध्ये ४५ वर्षीय धोनी मैदानात उतरणार की नाही, यावर अद्याप अनिश्चितता कायम आहे. दरम्यान, सीएसकेचा माजी खेळाडू एस. बद्रीनाथने धोनीच्या भूमिकेबाबत एक मोठा आणि धक्कादायक खुलासा केला आहे. धोनी आयपीएलमध्ये ‘इम्पॅक्ट प्लेयर’ म्हणून मैदानात उतरण्यास अजिबात तयार नाही, असा दावा बद्रीनाथने केला आहे.
“मी पूर्णवेळ यष्टिरक्षक!”; धोनीने बद्रीनाथशी बोलताना स्पष्ट केली भूमिका –
आपल्या यूट्यूब चॅनेलवर बोलताना एस. बद्रीनाथ म्हणाला, “धोनीने स्वतः माझ्याशी संवाद साधताना स्पष्ट केले आहे की, तो कधीही इम्पॅक्ट प्लेयर म्हणून खेळणार नाही. धोनी स्वतःला अजूनही पूर्णवेळ यष्टिरक्षक मानतो. जर तो खेळला, तर त्याला संपूर्ण २० षटके यष्टिरक्षण आणि नेतृत्व करावे लागेल. त्यामुळे केवळ फलंदाजीपुरते मर्यादित राहून १२ वा खेळाडू बनण्याचा विचार त्याच्या मनात अजिबात नाही.”
इम्पॅक्ट प्लेयर खेळल्यास CSK ला फायदा; बद्रीनाथचे वैयक्तिक मत –
🔴I WON’T PLAY AS AN IMPACT PLAYER – MS DHONI🤯
🎙️: S. Badrinath says Dhoni has personally told him multiple times that he won’t play as an Impact Player.
He sees himself as a full-time wicketkeeper and wants to be on the field for the entire 20 overs. pic.twitter.com/AEo1ib2UWA
— Sam (@cricsam02) September 3, 2026
धोनीच्या या मताशी असहमती दर्शवत बद्रीनाथने सीएसकेच्या रणनीतीवर भाष्य केले. “माझ्या मते, धोनीने इम्पॅक्ट प्लेयर म्हणून खेळणे संघासाठी अधिक फायदेशीर ठरेल. वाढत्या वयामुळे त्याचे शरीर दीर्घकाळ मैदानावर राहण्याचा ताण सहन करू शकत नाही. मुख्य प्रशिक्षक स्टीफन फ्लेमिंग यांनीही याकडे लक्ष वेधले होते. जर धोनी १६ व्या षटकानंतरच फलंदाजीला येणार असेल, तर इम्पॅक्ट प्लेयर हाच त्याच्यासाठी आणि संघासाठी सर्वात व्यवहार्य पर्याय आहे,” असे बद्रीनाथने नमूद केले.
२७८ सामन्यांत ५४३९ धावा अन् २०१ शिकार; धोनीचा विक्रमी प्रवास –
२०२० मध्ये आंतरराष्ट्रीय क्रिकेटला अलविदा केल्यानंतर धोनी केवळ आयपीएलमध्येच सक्रिय आहे. त्याने आतापर्यंत २७८ आयपीएल सामन्यांत ३८ च्या सरासरीने आणि १३७ च्या स्ट्राईक रेटने ५४३९ धावा कुटल्या आहेत. त्याच्या नेतृत्वाखाली सीएसकेने विक्रमी ५ वेळा आयपीएल चॅम्पियन बनण्याचा मान मिळवला. याशिवाय यष्टिरक्षक म्हणून २१ मोसमांच्या प्रवासात २०१ खेळाडूंना बाद करण्याचा सर्वोच्च विक्रमही धोनीच्या नावावर अबाधित आहे.
