फलटण,(प्रतिनिधी) – बारामतीचे पाणी फलटणला आणल्यामुळेच आपली खासदारकी गेली आहे. परंतु, फलटण खासदारकी गेली, तरी फलटण तालुक्याच्या विकासाबाबत कसलीही तडजोड करणार नसल्याचे प्रतिपादन माजी खासदार रणजितसिंह नाईक-निंबाळकर यांनी केले.

सासवड, ता. फलटण येथील धोम बलकवडी मायनर 37 व 33 च्या उदघाटन रणजितसिंह नाईक निंबाळकर व ज्येष्ठ नेते प्रल्हाद साळुंखे-पाटील यांच्या प्रमुख उपस्थितीत पार पडले. यावेळी रणजितसिंह नाईक-निंबाळकर बोलत होते.

यावेळी फलटण कोरेगाव विधानसभा प्रमुख सचिन कांबळे पाटील, तालुकाध्यक्ष बजरंग गावडे, धनंजय साळुंखे पाटील, संत कृपा डेअरीचे प्रमुख विलासराव नलवडे, माजी जिल्हा परिषद अध्यक्ष माणिकराव सोनवलकर,

शहराध्यक्ष अमोल सस्ते, माजी नगरसेवक अनुप शहा, किसान मोर्चा तालुकाध्यक्ष जयवंत केंजळे, माजी नगरसेवक सचिन अहिवळे, लतीफभाई तांबोळी, शंभूराजे बोबडे यांच्यासह प्रमुख पदाधिकारी कार्यकर्ते उपस्थित होते.

यावेळी धोम बलकवडी लघुवितरिका, सासवड ते माळीबेंद रस्ता, माळी बेंद ते रासकर वस्ती रस्ता, लघुबंधारे, विद्युत पोल, महालक्ष्मी मंदिर संभामंडप व कंपाउंड आदी विकासकामांचे उदघाटन व लोकार्पण करण्यात आले.

रणजितसिंह निंबाळकर म्हणाले, 30 वर्षात रामराजेंनी फलटणचे पाणी बारामतीला विकले, लाल दिव्यासाठी फलटणच्या जनतेला बारामतीत गहाण ठेवले त्यांनी देवेंद्र फडणवीस व खासदार रणजितसिंह नाईक निंबाळकर यांच्या कामाचे श्रेय घेऊ नये.

ज्या आमदाराला मतदारसंघाला निधी किती आला हे माहित नसते हे तालुक्याचे दुर्दैव म्हणावे लागेल आणि असल्या नंदीबैलाला घरी पाठवण्याची वेळ आता आली आहे. येत्या विधानसभेत फलटण ची सुज्ञ जनता ते काम चोख करेल यात शंका वाटत नाही.

अनुप शहा म्हणाले, कॉन्टॅक्टच्या माध्यमातून चाललेला भ्रष्टाचार, विकास सोसायटी मधून शेतकऱ्यांना सभासद होण्यासाठी दिला जाणारा त्रास,

कोटींच्या वर खर्च केलेल्या पाण्याच्या योजना तरीही गावात राज्यातील पहिला पाण्याचा टँकर सासवडमध्ये, ग्रामपंचायतमध्ये घोटाळे, डोंबाळवाडी योजना घोटाळा झालाय. येत्या निवडणुकीत धडा शिकवलाच पाहिजे.

प्रल्हाद पाटील म्हणाले, रामराजे यांनी लोकसभेला युती धर्म पाळला नाही. त्यामुळे येणाऱ्या निवडणुकीत भाजपा देखील त्यांना निवडणुकीत हरवण्यासाठीच काम करेल.

केलेल्या कामाचे श्रेय घ्यावे पण ज्या कामात काहीही हातभार नसताना आयत्या पिठावर रेघोट्या रामराजेंनी ओढू नयेत.

यावेळी अमोल चंद्रकांत झणझणे यांची किसान मोर्चा फलटण तालुका सरचिटणीसपदी नियुक्ती करण्यात आली.

अखिल भारतीय संत नामदेव महाराज संस्थेच्यावतीने संत नामदेव महाराज यांच्या स्मारकासाठी खासदार रणजितसिंह नाईक निंबाळकर यांनी रेल्वेची जमीन उपलब्ध करून दिल्याबद्दल संस्थेचे अध्यक्ष व सहकारी यांनी त्यांचा सत्कार करण्यात आला. स्वागत व प्रास्ताविक राजेंद्र काकडे यांनी केले. किरण जाधव यांनी आभार मानले.