मोरगाव : मोरगाव (ता . बारामती) येथील तीन महाविद्यालयीन युवतींचा अज्ञात वाहनाच्या धडकेने अपघात झाला . यामध्ये ऋतुजा दिपक तावरे (वय वर्षे 19) हिचा जागीच मृत्यू तर दुचाकीवरील रुपाली अरुण कौले व अंकीता विष्णु तावरे या गंभीर जखमी झाल्या असुन या तीघीही सुपा येथील विद्या प्रतीष्ठानमध्ये शिकत आहेत .

बारामती तालुक्यातील विद्या प्रतीष्ठानच्या महाविद्यालयात विज्ञान शाखेच्या प्रथम वर्गात ऋतुजा दीपक तावरे , अंकीता विष्णू तावरे , व रुपाली अरुण कौले या शिकत आहेत . आज दि .29 रोजी महाविद्यालय सुट्टीनंतर आपल्या दुचाकीवरुन सुप्यावरुन मोरगावला येथे येत होत्या . दरम्यान सुपा-मोरगाव या रस्त्यावरील राजबाग पाटी नजीक दुपारी एक वाजण्याच्या दरम्यान आल्या असता अज्ञात वाहनाने जोरदार धडक दिली .

यामध्ये मोरगाव नजीक शेराचीवस्ती येथील ऋतूजा दिपक तावरे या महाविद्यालयीन तरुणीचा जागीच मृत्यू झाला. तर अंकीता विष्णु तावरे , रुपाली अरुण कौले या गंभीर जखमी झाल्या आहेत. त्यांना मोरगाव येथे खाजगी रुग्णालयात पुढील उपचारासाठी दाखल केले आहे.