नवी दिल्ली – केंद्रीय औषध प्रशासनाने सीरम इन्स्टिट्यूटच्या कोव्होव्हॅक्‍स आणि बायोलॉजिकल ई च्या कोर्बेवॅक्‍स आणि करोनावरील मोलनुपीरावीर या गोळ्यांच्या आपत्कालीन वापराला मान्यता दिली. ही माहिती केंद्रीय आरोग्यमंत्री मनसूख मांडवीय यांनी मंगळवारी दिली.

केंद्रीय औषध नियंत्रण दर्जा नियंत्रण संस्थेच्या विषय तज्ज्ञ समितीने या संदर्भात शिफारस केल्यानंतर दुसऱ्या दिवशी हा निर्णय जाहीर करण्यात आला. करोनाचा संसर्ग झालेल्या प्रौढांना मोलनुपीरावीर या गोळ्या देण्यासही मान्यता देण्यात आली आहे. या लसींना मान्यता दिल्यामुळे आपत्कालीन वापरासाठी मान्यता मिळालेल्या लसींची संख्या आठवर पोहोचली आहे.

सीरमचीच कोविशिल्ड, भारत बायोटेकची को व्हॅक्‍सिन, झायडस कॅडिलाची झायकोव्ह-डी, रशियाची स्पुटनिक व्ही, आणि अमेरिकेतील मॉडर्ना आणि जॉन्सन अँड जॉन्सनच्या लसींच्या वापराला यापुर्वी मान्यता दिली आहे.

कोर्बेव्हॅक्‍स ही भारतात संपूर्णत: स्वदेशी बनावटीची आरबीडी प्रथीनयुक्त लस आहे. हैदराबाद येथील बायोलॉजिकल – ई या कंपनीने ती बनवली आहे. ही भारतात बनवलेली तीसरी लस असल्याचे आणखी एक ट्‌विट मांडवीय यांनी केले आहे.

मोलनुपीरावीर हे विषाणूविरोधी औषध सध्या भारतात 13 कंपन्यांकडून उत्पादित केले जात आहे. या औषधाचा प्रौढ रुग्णांवर वापर करण्यास आणि ज्यांच्यात संसर्गाची वाढ वेगाने होण्याची शक्‍यता आहे त्यांना देण्यास मान्यता दिली आहे, असे मांडवीय यांनी सांगितले.

सीरमने कोव्होव्हॅक्‍स लसीच्या वापराला मान्यता देण्याचा अर्ज दुसऱ्यांदा केला होता. त्यात जागतिक आरोग्य संघटनेने आणि युरोपीयन महासंघाने या लसीच्या आपत्कालीन वापराला मान्यता दिल्याचे नमूद केले होते. त्या अर्जाला तज्ज्ञांच्या समितीने मान्यता दिली, असे सरकारी सूत्रांनी सांगितले.

सीरमचे सरकारी आणि नियामक कार्य संचालक प्रकाश कुमार सिंह यांनी कोवोव्हॅक्‍सला मान्यता देण्याचा पहिला अर्ज ऑक्‍टोबरमध्ये दाखल केला होता. गरीब आणि मध्यम उत्पन्न देश आणि भारतातील वापरासाठी या लसीच्या उत्पादनाचा करार अमेरिकेतील लस उत्पादक नोव्हाव्हॅक्‍सने सीरमसोबत ऑगस्ट 2020 मध्ये केला होता. या लसीला जागतिक आरोग्य संघटनेने आपत्कालीन वापराला 17 डिसेंबरला मान्यता दिली होती.