Masoud Pezeshkian : इराणचे सर्वोच्च नेते मोजतबा खामेनी जिवंत असून ते देशाच्या कारभारावर लक्ष ठेवून आहेत, असा दावा राष्ट्राध्यक्ष मसूद पेझेश्कियन यांनी केला आहे. ‘इंडिया टुडे’ला दिलेल्या मुलाखतीत ही माहिती दिली असून खामेनी यांच्याबाबत सुरू असलेल्या चर्चांना पूर्णविराम दिला आहे.

खामेनी यांच्या ठावठिकाणाबाबत माहिती जाहीर न करण्यामागे सुरक्षेचे कारण असल्याचे पेझेश्कियन यांनी सांगितले. अमेरिकन आणि इस्रायली सैन्याने इराणच्या नेत्यांसह लष्करी अधिकारी आणि शास्त्रज्ञांना लक्ष्य केले आहे. त्यामुळे सर्वोच्च नेत्याचे स्थान गुप्त ठेवणे आवश्यक असल्याचे त्यांनी स्पष्ट केले.

खामेनी हेच इराणचे अंतिम निर्णय घेणारे व्यक्ती आहेत, असेही पेझेश्कियन यांनी स्पष्ट केले. राष्ट्राध्यक्ष, इस्लामिक रिव्होल्युशनरी गार्ड कॉर्प्स किंवा अन्य कोणत्याही नेत्यापेक्षा सर्वोच्च नेत्याचा निर्णय अंतिम असतो, असे त्यांनी सांगितले.

दरम्यान, खामेनी अनेक महिन्यांपासून सार्वजनिक ठिकाणी दिसलेले नाहीत. त्यामुळे त्यांच्या प्रकृतीबाबत आणि नेतृत्वाबाबत विविध चर्चा सुरू होत्या. मात्र, पेझेश्कियन यांच्या दाव्यानंतर या चर्चांना नवे वळण मिळाले आहे.

अमेरिका आणि इस्रायल इराणच्या नेतृत्वाविरोधात हल्ले करत असल्याचा आरोपही पेझेश्कियन यांनी केला. या कारवायांना त्यांनी ‘राज्य दहशतवाद’ असे संबोधले.