Pune MH-12 Update : पुणेकरांच्या अभिमानाचा आणि शहराच्या ओळखीचा अविभाज्य भाग बनलेला ‘MH-12’ हा वाहन नोंदणी कोड कायम राहण्याची शक्यता आता अधिक बळकट झाली आहे. पुणे आरटीओमधील विद्यमान ‘MH 12 ZZ’ ही शेवटची मालिका संपत आल्याने पुढे ‘MH-61’ हा नवीन कोड लागू होणार असल्याची चर्चा होती. मात्र, पुण्याची ऐतिहासिक ओळख जपण्यासाठी केंद्रीय राज्यमंत्री आणि पुण्याचे खासदार मुरलीधर मोहोळ यांनी दिल्लीत जाऊन केंद्रीय रस्ते वाहतूक व महामार्ग मंत्री नितीन गडकरी यांच्याकडे विशेष प्रस्ताव मांडला आहे.  (Pune MH-12 Update)

पुण्यातील वाहनसंख्या झपाट्याने वाढत असल्याने सध्याची नोंदणी मालिका संपण्याच्या मार्गावर आहे. त्यामुळे नवीन वाहनांसाठी पुढील नोंदणी प्रणाली काय असावी, याबाबत परिवहन विभागात विचारमंथन सुरू होते. या पार्श्वभूमीवर पुण्याला ‘MH-61’ हा नवीन कोड मिळू शकतो, अशी चर्चा रंगली होती. मात्र, ‘MH-12’ हा केवळ वाहन क्रमांक नसून पुण्याच्या सांस्कृतिक आणि ऐतिहासिक ओळखीचा भाग बनला आहे. त्यामुळे हा कोड बदलू नये, अशी मागणी पुणेकरांकडून सातत्याने केली जात होती.  (Pune MH-12 Update)

 

याच भावना लक्षात घेऊन मुरलीधर मोहोळ यांनी नवी दिल्लीत नितीन गडकरी यांची भेट घेतली. या भेटीत ‘MH-12’ कोड कायम ठेवत त्याअंतर्गत ‘MH 12 1A’, ‘MH 12 1B’, ‘MH 12 1C’ अशा स्वरूपातील नव्या नोंदणी मालिकांचा पर्याय सुचवण्यात आला. ‘एक अंक आणि एक इंग्रजी अक्षर’ अशा स्वरूपातील नोंदणी मालिका लागू करण्याचा हा देशातील पहिलाच प्रस्ताव असल्याचे सांगितले जात आहे.  (Pune MH-12 Update)

या नव्या पद्धतीमुळे पुण्याची ‘MH-12’ ही ओळख कायम राहण्यासोबतच भविष्यातील वाहन नोंदणीसाठी मोठी क्षमता उपलब्ध होणार आहे. या प्रस्तावावर केंद्रीय मंत्री नितीन गडकरी यांनी सकारात्मक भूमिका घेत आवश्यक त्या सूचना देण्याचे आश्वासन दिल्याची माहिती समोर आली आहे.  (Pune MH-12 Update)

सध्या ‘MH 12 ZZ’ ही शेवटची मालिका सुरू असून, ती संपल्यानंतर अंतिम निर्णय केंद्र सरकार आणि परिवहन विभागाकडून घेतला जाणार आहे. मात्र, मुरलीधर मोहोळ यांच्या पुढाकारामुळे ‘MH-12’ ही पुण्याची ओळख कायम राहण्याच्या आशा अधिक दृढ झाल्या आहेत.  (Pune MH-12 Update)

Amruta Dhongade : अमृता धोंगडेचे छोट्या पडद्यावर पुनरागमन; खलनायिकेची साकारणार भूमिका