Mohanlal : मोहनलाल यांच्या आगामी चित्रपटाची घोषणा; ‘ऑपरेशन गंगा’मध्ये दिसणार महत्त्वाच्या भूमिकेत
Mohanlal : ‘दृश्यम’ चित्रपटाच्या तिन्ही भागांना मिळालेल्या चांगल्या प्रतिसादानंतर मोहनलाल यांच्या या नव्या प्रोजेक्टबाबत चाहत्यांमध्ये उत्सुकता निर्माण झाली आहे.
Mohanlal : दाक्षिणात्य सुपरस्टार मोहनलाल यांच्या आगामी चित्रपटाची घोषणा करण्यात आली आहे. राष्ट्रीय पुरस्कार विजेते चित्रपट निर्माते विष्णू मोहन यांच्या दिग्दर्शनाखाली हा चित्रपट तयार होणार असून, मोहनलाल या चित्रपटात महत्त्वाच्या भूमिकेत झळकणार आहेत.
‘दृश्यम’ चित्रपटाच्या तिन्ही भागांना मिळालेल्या चांगल्या प्रतिसादानंतर मोहनलाल (Mohanlal) यांच्या या नव्या प्रोजेक्टबाबत चाहत्यांमध्ये उत्सुकता निर्माण झाली आहे. L367 असे चित्रपटाचे नाव सुरूवातीला समोर आले होते. आता या चित्रपटाचे अधिकृत नाव ‘ऑपरेशन गंगा’ ठेवण्यात आले आहे. (Mohanlal)
रशिया-युक्रेन युद्ध सुरू झाल्यानंतर युक्रेनमध्ये अडकलेल्या विद्यार्थ्यांसह हजारो भारतीय नागरिकांना सुरक्षितपणे मायदेशी परत आणण्यासाठी भारताने राबवलेल्या बचाव मोहिमेवर चित्रपटाची कथा आधारित आहे. (Mohanlal)
‘ऑपरेशन गंगा’ची कथा केवळ युद्धाच्या पार्श्वभूमीवर आधारित नसेल, तर युक्रेनमध्ये अडकलेल्या विद्यार्थ्यांनी अनुभवलेला कठीण काळ आणि त्यांना सुरक्षितपणे भारतात परत आणण्यासाठी सरकारने केलेले प्रयत्न यांचाही चित्रपटात समावेश असेल, अशी माहिती समोर आली आहे. त्यामुळे या चित्रपटाकडून प्रेक्षकांच्या अपेक्षा वाढल्या आहेत.
अशी आहे चित्रपटाची टीम (Mohanlal)
‘श्री गोकुळम मुव्हीज’च्या बॅनरखाली गोकुळम गोपालन या चित्रपटाची निर्मिती करत आहेत. मोहनलाल यांच्यासोबत अर्जुन रामपाल, भाग्यश्री, पार्थिबन आणि आदिल हुसेन हे कलाकारही महत्त्वाच्या भूमिकेत दिसणार आहेत.
‘धुरंधर’ चित्रपटाच्या यशानंतर संगीतकार शश्वत सचदेव ‘ऑपरेशन गंगा’साठी संगीत देणार आहेत. चित्रपटाच्या तांत्रिक टीममध्ये ‘पुष्पा’ आणि ‘पुष्पा २’साठी ओळखले जाणारे सिनेमॅटोग्राफर मिरोस्लाव कुबा ब्रोझेक यांचा समावेश आहे. ‘GOAT’, ‘मेया जगन’, ‘अमरन’ आणि ‘कथानर’ यांसारख्या चित्रपटांवर काम केलेले प्रोडक्शन डिझायनर राजीवन हेही या चित्रपटाशी जोडले गेले आहेत.
‘धुरंधर’ आणि ‘किल’ या चित्रपटांसाठी ओळखले जाणारे अॅक्शन दिग्दर्शक सी यंग ओह हेदेखील ‘ऑपरेशन गंगा’च्या टीममध्ये आहेत. गोकुळम गोपालन आणि व्ही.सी. प्रवीण सह-निर्माते असून, कृष्णमूर्ती कार्यकारी निर्माते म्हणून जबाबदारी सांभाळणार आहेत.
चित्रपटाच्या प्रदर्शनाची तारीख आणि इतर महत्त्वाची माहिती अद्याप समोर आलेली नाही. मात्र, मोहनलाल यांची भूमिका आणि युद्धाच्या पार्श्वभूमीवरील कथा यामुळे ‘ऑपरेशन गंगा’कडे चाहत्यांचे लक्ष लागले आहे.
