चंदीगढ – पंजाबमधील मोहाली येथे झालेल्या हल्ल्याशी संबंधित प्रकरणात पोलिसांना मोठे यश मिळाले आहे. हा हल्ला बब्बर खालसा इंटरनॅशनलने पाक आयएसआयच्या पाठिंब्याने घडवून आणल्याचा दावा पंजाबचे डीजीपी व्हीके भवरा यांनी केला आहे. या हल्ल्यातील मुख्य आरोपीचीही ओळख पटली आहे. पंजाब पोलिसांनी दिलेल्या माहितीनुसार, मोहाली येथील गुप्तचर विभागाच्या पोलिस मुख्यालयावर झालेल्या आरपीजी हल्ल्याचा मुख्य सूत्रधार लखबीर सिंग लांडा आहे. हरिंदर सिंग रिंडा यांचा तो जवळचा सहकारी आहे. तो तरनतारन जिल्ह्यातील रहिवासी आहे. तो 2017 मध्ये कॅनडाला गेला होता. त्याचे पाकिस्तान आयएसआयशी जवळचे संबंध आहेत.

पंजाब डीजीपीच्या म्हणण्यानुसार, हा हल्ला BKI (बब्बर खालसा इंटरनॅशनल) ने पाक ISI च्या पाठिंब्याने केला होता. लांडाच्या मुख्य साथीदारांपैकी एक निशान सिंग आहे. तो तरनतारनचा रहिवासीही आहे. काही दिवसांपूर्वी फरीदकोट पोलिसांनी त्याला अटक केली होती. डीजीपी म्हणाले की, या प्रकरणात आम्ही कंवर बाथ, बलजीत कौर, बलजिंदर, अनंतदीप सोनू, जगदीप कांग आणि निशान सिंह यांच्यासह 6 जणांना अटक केली आहे. आम्ही मोहम्मद नसीम आणि शर्फ राज यांना नोएडा येथून चौकशीसाठी आणले आहे. चरत सिंग आणि इतर 2 जणांनी ही घटना घडवली होती. त्यांना अद्याप अटक करण्यात आलेली नाही.

The key conspirator is Lakhbir Singh Landa. He’s a resident of Tarn Taran. He is a gangster & shifted to Canada in 2017. He is a close associate of Harinder Singh Rinda, who is in close proximity to Wadhawa Singh & part ISI & he operates from Pakistan: Punjab DGP on Mohali blast pic.twitter.com/UoggjpNQWV

— ANI (@ANI) May 13, 2022

मास्टरमाइंड लखबीर सिंग लांडा कॅनडामध्ये –

पंजाब पोलिसांनी मोहाली येथील इंटेलिजन्स विंगच्या मुख्यालयात रॉकेट प्रोपेल्ड ग्रेनेड फायर करण्यासाठी वापरलेले लाँचर जप्त केले आहे. याशिवाय या प्रकरणात अनेक संशयितांनाही अटक करण्यात आली आहे. हे लक्षात घेण्यासारखे आहे की मोहालीतील सेक्टर 77 मधील पोलिसांच्या इंटेलिजन्स युनिटच्या मुख्यालयावर सोमवारी रात्री रॉकेट प्रोपेल्ड ग्रेनेडने हल्ला करण्यात आला, ज्यामुळे इमारतीच्या खिडक्यांच्या काचा फुटल्या. या घटनेकडे गुप्तचर यंत्रणेचे मोठे अपयश म्हणून पाहिले जात आहे, कारण या इमारतीमध्ये राज्याच्या ‘काउंटर इंटेलिजन्स विंग’, स्पेशल टास्क फोर्स आणि इतर काही युनिट्सची कार्यालये आहेत. या घटनेत कोणतीही जीवितहानी झालेली नाही. राजकीय पक्षांनी ही घटना अस्वस्थ करणारी आणि धक्कादायक असल्याचे म्हटले आहे.

पंजाबचे मुख्यमंत्री म्हणाले – राज्यातील वातावरण बिघडवण्याचा प्रयत्न केला जातोय –
राज्यातील वातावरण बिघडवणाऱ्यांना कठोर शिक्षा केली जाईल, असे पंजाबचे मुख्यमंत्री भगवंत मान यांनी म्हटले आहे. या बैठकीनंतर मान म्हणाले की, काल महोली येथे घडलेल्या घटनेबाबत मी डीजीपी आणि इंटेलिजन्स युनिटच्या अधिकाऱ्यांसोबत बैठक घेतली आहे. सर्व तथ्य बाहेर येत आहे. काहींना अटक करण्यात आली असून आणखी काही लोकांनाही अटक करण्यात येणार आहे. ते म्हणाले, जो कोणी पंजाबचे वातावरण बिघडवण्याचा प्रयत्न करेल त्याला कठोरात कठोर शिक्षा मिळेल, जी येणाऱ्या पिढ्यांनाही लक्षात राहील.