पुणे : पुणे जिल्ह्यात उद्या (७ मे) तीन ठिकाणी मॉक ड्रिल आयोजित करण्यात येणार आहे. विधान भवन (पुणे शहर), मुळशी पंचायत समिती आणि तळेगाव नगरपरिषद येथे दुपारी चार वाजता ही सराव मोहीम राबवली जाईल. युद्धजन्य परिस्थितीत कमीत कमी वेळेत नागरिकांपर्यंत मदत आणि मार्गदर्शन पोहोचवण्याच्या तयारीसाठी हे मॉक ड्रिल आयोजित केले असल्याची माहिती जिल्हाधिकारी जितेंद्र डुडी यांनी पत्रकार परिषदेत दिली.

केंद्र सरकारच्या आदेशानुसार, देशभरातील २४४ जिल्ह्यांमध्ये एकाच वेळी ७ मे रोजी मॉक ड्रिल होणार आहे. पुणे जिल्ह्यातील या सरावात अग्निशमन दल, आपत्ती निवारण दल (एडीआरएफ), संरक्षण आणि पोलीस विभागातील १० ते १५ कर्मचारी तसेच १०० ते १५० महाविद्यालयीन विद्यार्थी सहभागी होणार आहेत. “एखाद्या इमारतीत आग लागल्यास कशा पद्धतीने कार्यवाही करायची, याचे प्रात्यक्षिक या मॉक ड्रिलद्वारे दाखवले जाईल,” असे डुडी यांनी सांगितले.

पुणे शहरात ७५ ठिकाणी सायरनची व्यवस्था करण्यात आली आहे; मात्र, बुधवारी हे सायरन वाजणार नाहीत. याशिवाय, सर्व विभागांचा समन्वय साधण्यासाठी वॉर रूम तयार करण्यात येणार आहे. डुडी यांनी स्पष्ट केले की, पुण्यात ब्लॅक आउटचा सराव होणार नाही; परंतु मुंबईत एका ठिकाणी ब्लॅक आउटचा सराव केला जाईल. “सायरन वाजल्यानंतर नागरिकांनी काय करावे, याबाबत मार्गदर्शन केले जाईल,” असेही त्यांनी नमूद केले.

या मॉक ड्रिलद्वारे युद्धजन्य किंवा आपत्कालीन परिस्थितीत नागरिकांच्या सुरक्षेसाठी प्रशासनाची तयारी तपासली जाणार आहे. केंद्र सरकारच्या निर्देशानुसार राबवल्या जाणाऱ्या या मोहिमेकडे पुणेकरांचे लक्ष लागले आहे.