MLA Sunil Shelke – आमदार सुनील शेळके यांनी पुणे जिल्ह्याचे उपवनसंरक्षक अभिजीत वायकोस यांची शेतकरी, ग्रामस्थ आणि संबंधित अधिकाऱ्यांसमवेत बैठक घेत विविध महत्त्वाच्या विषयांवर सविस्तर चर्चा केली. मावळ तालुक्यातील वनहद्दीमुळे अनेक वर्षांपासून रखडलेल्या विकासकामांना गती देण्यासाठी ही बैठक महत्त्वपुर्ण ठरली. वन परवानग्यांअभावी रखडलेल्या सार्वजनिक सुविधांशी संबंधित कामांचा या बैठकीत आढावा घेण्यात आला.

संबंधित विभागांनी आवश्यक कागदपत्रांसह परिपूर्ण प्रस्ताव तातडीने सादर करावेत, जेणेकरून प्रलंबित कामांबाबत सकारात्मक निर्णय घेऊन ती मार्गी लावता येतील, असे निर्देश आमदार शेळके यांनी यावेळी दिले. बैठकीत सर्वप्रथम मावळातील ऐतिहासिक गड-किल्ल्यांकडे जाणाऱ्या रस्त्यांचा विषय उपस्थित करण्यात आला. तालुक्यातील ऐतिहासिक किल्ल्यांना वर्षभर हजारो पर्यटक भेट देतात.

मात्र अनेक रस्ते वनहद्दीतून जात असल्याने त्यांच्या दुरुस्ती आणि रुंदीकरणाची कामे रखडली आहेत. या रस्त्यांची दुरुस्ती झाल्यास पर्यटकांना सुरक्षित प्रवास करता येईल, असे मत बैठकीत व्यक्त करण्यात आले. तसेच शासनाने क दर्जा प्रदान केलेल्या तीर्थक्षेत्रांच्या विकासाचाही विषय बैठकीत चर्चेला आला. ग्रामीण भागातील अनेक गावांमध्ये स्मशानभूमीसाठी जागा उपलब्ध नसल्याने नागरिकांना मोठ्या अडचणींचा सामना करावा लागत आहे.

नुकत्याच घडलेल्या काही घटनांमुळे हा प्रश्न अधिक गंभीर बनला आहे. त्यामुळे वनहद्दीत येणाऱ्या गावांमध्ये स्मशानभूमीसाठी योग्य जागा उपलब्ध करून देण्याबाबतही बैठकीत सविस्तर चर्चा करण्यात आली. पिण्याच्या पाण्याच्या योजनांसाठी आवश्यक पाण्याच्या टाक्या उभारण्यास अनेक ठिकाणी वन परवानग्यांचा अडथळा येत आहे. त्यामुळे ग्रामीण भागातील पाणीपुरवठा योजनांवर परिणाम होत आहे.