MLA Dnyaneshwar Katke – शिरूर-हवेली विधानसभा मतदारसंघातील वाघोली परिसराच्या सर्वांगीण विकासासाठी महत्त्वपूर्ण पावले उचलत 30 मीटर रुंदीचे तीन प्रमुख आरपी (रिंग प्लॅन) रस्ते विकसित करण्याची मागणी आमदार ज्ञानेश्वर कटके यांनी महापालिका आयुक्तांकडे निवेदनाद्वारे केली आहे. वाढत्या लोकसंख्या आणि वाहतूक कोंडी पार्श्वभूमीवर हे रस्ते उन्नत मार्ग आणि प्रस्तावित मेट्रोला पूरक ठरतील. त्यामुळे उन्नत मार्गाचे काम सुरू होण्यापूर्वीच हे रस्ते वाहतुकीसाठी खुले करणे आवश्यक असल्याचे कटके यांनी नमूद केले आहे. या प्रकल्पासाठी तातडीने निधी उपलब्ध करून कामाला गती द्यावी, तसेच प्रकल्पग्रस्तांना योग्य मोबदला देऊन जागा संपादनाची प्रक्रिया जलदगतीने पूर्ण करावी, अशी मागणीही त्यांनी केली. पीपीपी, हायब्रीड व मेनिटी टीडीआर या पर्यायांचाही विचार करण्याचे त्यांनी सुचवले आहे. याशिवाय, वाघोली येथील बायफ रोडवरील उर्वरित ड्रेनेज लाईनचे काम तातडीने पूर्ण करण्यासाठी आवश्यक निधी उपलब्ध करून देण्याबाबतही त्यांनी पाठपुरावा केला आहे. तसेच, वाघोलीतील अंतर्गत रस्त्यांच्या दुरुस्ती व विकासासाठी लेक्सिकॉन शाळा ते म्हसोबा मंदिर (आयव्ही इस्टेट, केसनंद रोड), बी.जे.एस. कॉलेज ते बकोरी रोड, तसेच वाघेश्वर मंदिर ते भावडी रोड या महत्त्वाच्या मार्गांच्या कामांसाठी निधी उपलब्ध करून देण्याची मागणी करण्यात आली आहे. याचबरोबर, वाघोली आरोग्य कोठी ‘अ’ व ‘ब’ येथे प्रत्येकी 50 टन क्षमतेचे घनकचरा वर्गीकरण प्रकल्प कार्यान्वित करण्याबाबतही त्यांनी प्रशासनाकडे पाठपुरावा केला. वाघोली परिसरातील नागरिकांना दर्जेदार पायाभूत सुविधा मिळाव्यात आणि वाहतुकीचा प्रश्न कायमस्वरूपी मार्गी लागावा, हा या मागणीमागील प्रमुख उद्देश असल्याचे आमदार ज्ञानेश्वर कटके यांनी स्पष्ट केले.
