MLA Babaji Kale – राजगुरुनगर शहरात जागा उपलब्ध करून दिल्यास महात्मा ज्योतिराव फुले व सावित्रीबाई फुले यांचा पूर्णाकृती पुतळा उभारण्यात येईल. तालुक्याचे वैभव वाढवणारे एक भव्य स्मारक उभारले जाईल, असे प्रतिपादन आमदार बाबाजी काळे यांनी केले. महात्मा फुले जयंतीनिमित्त खेड पंचायत समितीच्या आवारात आयोजित कार्यक्रमात ते बोलत होते. यावेळी महात्मा फुले यांच्या अर्धपुतळ्यास आमदार काळे यांच्या हस्ते पुष्पहार अर्पण करून अभिवादन करण्यात आले. या कार्यक्रमाचे आयोजन खेड तालुका समता परिषदेच्या वतीने करण्यात आले होते. यावेळी खेड पंचायत समितीच्या सभापती विद्याताई मोहिते, उपसभापती मंगेश सावंत, सहाय्यक गटविकास अधिकारी भोईर, राजगुरुनगर नगरपरिषदेचे अध्यक्ष मंगेश गुंडाळ, उपनगराध्यक्ष मनोहर सांडभोर, नगरसेवक वैभव घुमटकर, नगरसेविका सुप्रिया घुमटकर, राजगुरुनगर सहकारी बँकेचे उपाध्यक्ष रामदास धनवटे, समता परिषदेचे जिल्हाध्यक्ष शांताराम घुमटकर यांच्यासह अनेक मान्यवर उपस्थित होते. शिवव्याख्याते संपत गारगोटे यांनी आपल्या भाषणात महात्मा फुले यांच्या कार्याचा गौरव करताना सांगितले की, देशातील खरे महात्मा म्हणजे जोतिराव फुले. त्यांनी छत्रपती शिवाजी महाराजांचा इतिहास जनतेसमोर आणला. त्यांनीच पहिली शिवजयंती साजरी केली आणि महाराजांवर पहिला पोवाडा लिहिला. तसेच मुलींसाठी पहिली शाळा सुरू करून त्यांनी शिक्षणक्रांती घडवून आणल्याचेही त्यांनी नमूद केले. सभापती विद्याताई मोहिते म्हणाल्या की, सावित्रीबाई व महात्मा फुले यांनी स्त्री शिक्षणाची ज्योत प्रज्वलित केली. त्यांच्या कार्यामुळेच आज महिलांना विविध क्षेत्रांत पुढे जाण्याची संधी मिळत आहे. यावेळी ज्योती चव्हाण यांनी मनोगत व्यक्त केले. कार्यक्रमाचे सूत्रसंचालन कैलास मुसळे यांनी केले, तर जि. रं. शिंदे यांनी आभार मानले.
