Missing Link – पुणे-मुंबई द्रुतगती मार्गावरील महत्त्वाकांक्षी ’मिसिंग लिंक’ प्रकल्प विविध कारणांनी चर्चेत असतानाच, प्रकल्पाच्या प्रवेशद्वाराजवळ उभारण्यात आलेल्या एका शिल्पावरून नव्या वादाला तोंड फुटले आहे. या शिल्पामध्ये एका पुरुषासोबत अल्पवस्त्र परिधान केलेल्या महिलेचे चित्रण असल्याचे दिसत असून, त्यावरून सामाजिक स्तरावर संमिश्र प्रतिक्रिया उमटत आहेत. अब्जावधी रुपयांचा खर्च,

अत्याधुनिक तंत्रज्ञान आणि परदेशी तज्ज्ञांच्या सहकार्याने उभारण्यात आलेल्या या प्रकल्पात पहिल्याच पावसानंतर काही ठिकाणी निर्माण झालेल्या तांत्रिक अडचणींवरून विरोधकांनी सरकारवर टीका केली होती. त्याला मुख्यमंत्री यांनीही उत्तर देत प्रकल्पाच्या गुणवत्तेची बाजू मांडली होती. या पार्श्वभूमीवर आता शिल्पाविषयीचा मुद्दा चर्चेचा विषय ठरला आहे. काही नागरिक आणि सामाजिक संघटनांनी सार्वजनिक ठिकाणी अशा स्वरूपाचे शिल्प उभारण्याबाबत आक्षेप नोंदवला आहे.

एकीकडे महिला सन्मान, महिला सक्षमीकरण आणि सांस्कृतिक मूल्यांचा पुरस्कार केला जात असताना सार्वजनिक ठिकाणी अशा प्रकारचे शिल्प उभारणे योग्य आहे का, असा प्रश्न उपस्थित केला जात आहे. महाराष्ट्राच्या सांस्कृतिक परंपरा आणि सामाजिक संवेदनशीलतेचा विचार करूनच सार्वजनिक कलाकृतींची निवड व्हावी, अशी मागणीही करण्यात येत आहे. मात्र, कला क्षेत्रातील जाणकार याकडे वेगळ्या दृष्टीने पाहत आहेत. त्यांच्या मते, शिल्पकला ही कलात्मक अभिव्यक्तीचा भाग असून तिचे मूल्यमापन केवळ कलात्मक संदर्भातून केले पाहिजे.

कलाकृतीचा आशय, संकल्पना आणि प्रतीकात्मकता लक्षात घेऊनच त्याबाबत मत व्यक्त केले पाहिजे, असे त्यांचे मत आहे.या पार्श्वभूमीवर संबंधित विभागाने या शिल्पामागील संकल्पना, उद्देश आणि अधिकृत भूमिका स्पष्ट करावी, अशी मागणी विविध स्तरांतून पुढे येत आहे. सार्वजनिक ठिकाणी उभारल्या जाणार्‍या कलाकृती समाजाच्या भावना, सांस्कृतिक मूल्ये आणि अभिव्यक्ती स्वातंत्र्य यांचा समतोल साधणार्‍या असाव्यात, अशी अपेक्षा नागरिकांनी व्यक्त केली आहे.