Ministry of Information and Broadcasting : माहिती व प्रसारण मंत्रालयाने (Ministry of Information and Broadcasting) बुधवारी सर्व खाजगी सॅटेलाइट टीव्ही वाहिन्यांसाठी एक विशेष ॲडव्हायझरी जारी केली आहे. यात वाहिन्यांनी दहशतवादविरोधी कारवायांचे थेट प्रक्षेपण (लाइव्ह कव्हरेज) टाळावे, हिंसक दृश्ये दाखवताना काळजी घ्यावी आणि राष्ट्रविरोधी किंवा धार्मिक तेढ निर्माण करणारा मजकूर प्रसारित करू नये, असे स्पष्ट निर्देश देण्यात आले आहेत.

मंत्रालयाने (Ministry of Information and Broadcasting) वाहिन्यांना केबल टेलिव्हिजन नेटवर्क (रेगुलेशन) ॲक्ट, १९९५ आणि केबल टेलिव्हिजन नेटवर्क रूल्स, १९९४ अंतर्गत निश्चित केलेल्या प्रोग्राम कोडचे तंतोतंत पालन करण्यास सांगितले आहे. सुरक्षेच्या कारणास्तव कोणत्याही दहशतवादविरोधी मोहिमेचे लाइव्ह कव्हरेज दाखवण्यास बंदी घालण्यात आली आहे.

हिंसाचार, गुन्हेगारी, नैसर्गिक आपत्ती आणि लैंगिक शोषणा पीडितांची ओळख उघड न करण्याबाबत काळजी घेण्याच्या सूचना दिल्या आहेत. तसेच भारताचा अधिकृत व अचूक नकाशाच वापरणे बंधनकारक आहे. टीव्हीवरील थेट चर्चासत्रे (लाइव्ह डिबेट्स) किंवा पॅनेल चर्चेदरम्यान समाजात जातीय तेढ निर्माण होणार नाही किंवा राष्ट्रविरोधी विचारांना खतपाणी मिळणार नाही, याची दक्षता वाहिन्यांनी घ्यावी असे निर्देश देण्यात आले आहेत.

बातम्या, ग्राफिक्स किंवा व्हर्च्युअल अँकर्ससाठी कृत्रिम बुद्धिमत्तेचा वापर केवळ सहाय्यक टूल म्हणून करावा. बातमीची सत्यता, अचूकता आणि संवेदनशीलतेशी कोणतीही तडजोड केली जाऊ नये असे नमूद करतानाच मंत्रालयाने (Ministry of Information and Broadcasting) स्पष्ट केले आहे की, आंतर-विभागीय समितीच्या बैठकीत अनेक वाहिन्यांकडून नियमांचे उल्लंघन होत असल्याचे समोर आले आहे. या नव्या मार्गदर्शक तत्त्वांचे उल्लंघन केल्यास संबंधित वाहिन्यांवर केबल टेलिव्हिजन नेटवर्क कायद्यांतर्गत कडक कायदेशीर कारवाई केली जाईल.