MH Budget Session 2026: विधानसभेत सोमवारी अजित पवार यांच्या शोकप्रस्तावावर बोलताना त्यांचे पुतणे व राष्ट्रवादी काँग्रेस (शरदचंद्र पवार) पक्षाचे आमदार रोहित पवार यांना अश्रू अनावर झाले. “अजितदादा पवार नावाचा जादूगार संबंध महाराष्ट्राला हसवत हसवत गेला,” असे सांगताना त्यांचा कंठ दाटून आला. मुख्यमंत्री देवेंद्र फडणवीस यांनी मांडलेल्या शोकप्रस्तावावर बोलताना रोहित पवार यांनी अजितदादांच्या अनेक आठवणी जड अंतःकरणाने सांगितल्या. “दादा नेहमी मला सांगायचे की, रोहित तुझे शर्टचे वरचे बटण लावत जा. आता 40-50 वर्षांनंतर जेव्हा वर त्यांची भेट होईल, तेव्हाच मी हे बटण त्यांच्यापुढे लावेन. तोपर्यंत हे बटण असेच खुले राहील, कारण ते मला रोज दादांची आठवण करून देईल,” असे ते म्हणाले. हेही वाचा : “दादा, तुमचा हा निर्णय चुकलेला आहे, माघारी या”, अजित पवारांच्या आठवणीने सभागृह भावूक रोहित पवार यांनी आपल्या केसांबाबतही एक हृदयस्पर्शी आठवण सांगितली. दादांनी एकदा त्यांना केस कमी करण्यास सांगितले होते. दादा गेल्यावर त्यांनी आदरांजली म्हणून केस कापले. तसेच दादांनी शारीरिक वजन कमी करून राजकीय वजन वाढवण्याचा सल्ला दिला होता, तोही पाळेल, असे त्यांनी सांगितले. दादांच्या अपघातासाठी जे कोणी दोषी असतील, त्यांना तुरुंगात टाकल्याशिवाय स्वस्थ बसणार नाही, असा निर्धारही रोहित पवार यांनी यावेळी व्यक्त केला. उपमुख्यमंत्री सुनेत्रा पवार यांना राजकीय प्रवासात सर्वतोपरी साथ देण्याचे वचनही त्यांनी दिले. देवेंद्र फडणवीस यांना अजितदादांवरील सर्व खोटे आरोप पुसून खऱ्या अर्थाने आदरांजली वाहण्याची विनंतीही त्यांनी केली.
