पिंपरी : पुणे आणि पिंपरी-चिंचवड शहराच्या सार्वजनिक वाहतूक व्यवस्थेत महत्त्वाची भर पडणार असून, हिंजवडी ते शिवाजीनगर पुणे मेट्रो लाईन-३ प्रवाशांच्या सेवेत दाखल होण्यासाठी सज्ज झाली आहे. येत्या ३ नोव्हेंबर रोजी पंतप्रधान नरेंद्र मोदी यांच्या हस्ते या मेट्रो मार्गिकेचे उद्घाटन होणार आहे.

आयटी नगरी हिंजवडीला थेट शिवाजीनगरशी जोडणाऱ्या या मार्गामुळे दररोज प्रवास करणारे आयटी कर्मचारी, विद्यार्थी, नोकरदार आणि नागरिकांना मोठा दिलासा मिळणार आहे.

विशेष म्हणजे, या मेट्रोचे किमान भाडे १२ रुपये, तर कमाल भाडे ६२ रुपये निश्चित करण्यात आले आहे. अंतरानुसार आकारण्यात येणाऱ्या या भाड्यामुळे प्रवाशांना तुलनेने सुलभ प्रवासाचा पर्याय उपलब्ध होणार आहे.

पुणे महानगर प्रदेश विकास प्राधिकरणामार्फत (पीएमआरडीए) उभारण्यात आलेली ही मार्गिका २३.२०३ किलोमीटर लांबीची असून, त्यावर २३ उन्नत स्थानकांचा समावेश आहे.

माण येथून सुरू होणारी ही मार्गिका हिंजवडीतील राजीव गांधी इन्फोटेक पार्क, प्रमुख व्यावसायिक केंद्रे आणि प्रशासकीय परिसरांना जोडत शिवाजीनगरपर्यंत पोहोचणार आहे. सुमारे ८ हजार ३१३ कोटी रुपये खर्चाच्या या प्रकल्पाची अंमलबजावणी सार्वजनिक-खासगी भागीदारी तत्त्वावर करण्यात आली आहे.

पहिल्या टप्प्यात २३ पैकी १७ स्थानकांचे लोकार्पण करण्यात येणार असून, उर्वरित सहा स्थानकांचे काम टप्प्याटप्प्याने पूर्ण केले जाणार आहे. त्यापैकी काही स्थानकांवर सुरुवातीला एकाच बाजूने प्रवासी सेवा उपलब्ध होणार आहे.

या मार्गावर अल्स्टॉम कंपनीच्या २२ आधुनिक मेट्रो गाड्या धावणार असून, वातानुकूलित डबे, प्रवासी माहिती प्रणाली, स्वयंचलित तिकीट व्यवस्था, मोबाईल व लॅपटॉप चार्जिंग अशा सुविधा उपलब्ध असतील. सकाळी ६ वाजल्यापासून मेट्रो सेवा सुरू करण्याचे नियोजन आहे.

मेट्रोच्या संचालनासाठी आधुनिक सिग्नल यंत्रणा, स्वतंत्र वीजपुरवठा आणि एकात्मिक नियंत्रण व्यवस्था उभारण्यात आली आहे. तसेच सौरऊर्जा निर्मिती, पर्यावरणपूरक बांधकाम साहित्याचा वापर आणि वृक्षारोपण यांवरही भर देण्यात आला आहे.

या मेट्रोमुळे हिंजवडी, माण, बाणेर, पाषाण आणि शिवाजीनगर परिसरातील वाहतुकीचा ताण कमी होण्यास मदत होईल. खासगी वाहनांवरील अवलंबित्व कमी करून सार्वजनिक वाहतुकीला चालना देणारा हा प्रकल्प पुणे महानगर प्रदेशाच्या विकासातील महत्त्वाचा टप्पा ठरणार आहे.

मेट्रो प्रकल्पाची वैशिष्ट्ये

– मार्गिका : माण ते हिंजवडी ते शिवाजीनगर
– एकूण लांबी : २३.२०३ किलोमीटर
– एकूण स्थानके : २३ उन्नत स्थानके
– पहिल्या टप्प्यात लोकार्पण : १७ स्थानके
– प्रकल्पाची किंमत : ८,३२३ कोटी रुपये
– मेट्रो गाड्या : २२ (अल्स्टॉम कंपनी)
– संचालन व देखभाल : केओलिस इंडिया प्रा. लि.
– उद्घाटन : ३ नोव्हेंबर २०२६

मेट्रोचे अंतरानुसार तिकीट दर

प्रवासाचे अंतर| तिकीट दर
० ते २ किलोमीटर| १२ रुपये
२ ते ४ किलोमीटर| २५ रुपये
४ ते ८ किलोमीटर| ३७ रुपये
८ ते १२ किलोमीटर| ४३ रुपये
१२ ते १८ किलोमीटर| ४९ रुपये
१८ किलोमीटरपेक्षा अधिक| ६२ रुपये

Pune Agreement Centenary: पुणे करार शताब्दीसाठी पालिकेचा पुढाकार