पिंपरी : पुणेकरांसह लाखो आयटी कर्मचाऱ्यांचा रोजचा प्रवास सुकर करणारी हिंजवडी ते शिवाजीनगर मेट्रो (लाईन ३) सेवा सुरू होण्याची प्रतीक्षा आता संपणार आहे. या मार्गावरील पहिल्या टप्प्याचे उद्घाटन सप्टेंबरच्या पहिल्या आठवड्यात पंतप्रधान नरेंद्र मोदी यांच्या हस्ते ऑनलाइन पद्धतीने होणार असल्याची खात्रीशीर माहिती हाती आली आहे.

या कार्यक्रमाला राज्याचे मुख्यमंत्री देवेंद्र फडणवीस आणि उपमुख्यमंत्री एकनाथ शिंदे व उपमुख्यमंत्री सुनेत्रा पवार हेदेखील उपस्थित राहतील. तथापि, उद्घाटनाच्या अधिकृत तारखेची निश्चिती अद्याप झालेली नाही.

पुणे महानगर प्रदेश विकास प्राधिकरण (पीएमआरडीए) आणि टाटा समूहाची ‘पुणे आयटी सिटी मेट्रो रेल लिमिटेड’ (पीआयटीसीएमआरएल) व सीमेन्स यांच्या संयुक्त विद्यमाने सार्वजनिक-खासगी भागीदारी (पीपीपी) तत्त्वावर हा प्रकल्प उभारण्यात येत आहे.

या मार्गावरील (माण ते बालेवाडी) पहिल्या टप्प्यातील सेवेला मेट्रो रेल्वे सुरक्षा आयुक्तांनी (सीएमआरएस) २३ जुलैला मंजुरी दिल्याने सेवा सुरू होण्याचा मार्ग खुला झाला आहे.

हिंजवडी ते शिवाजीनगर हा २३.३ किलोमीटरचा संपूर्ण उन्नत मार्ग असून, यावर एकूण २३ स्थानके आहेत. ही मेट्रो दोन टप्प्यांत सुरू होणार आहे. पहिला टप्पा माण (हिंजवडी) ते बालेवाडी असा १२ स्थानकांचा असेल, तर दुसरा टप्पा बाणेर हाय स्ट्रीट ते शिवाजीनगर असा असेल.

सुरक्षा चाचण्यांची पूर्तता झाल्यामुळे या मार्गावर मेट्रो ताशी कमाल ८० किलोमीटर वेगाने धावू शकणार आहे.पीएमआरडीएने ‘डिझाईन, बिल्ड, फायनान्स, ऑपरेट अँड ट्रान्सफर’ (डीबीएफओटी) तत्त्वावर ३५ वर्षांच्या कालावधीसाठी (पुढील २५ वर्षे मुदतवाढीच्या तरतुदीसह) ‘पीआयटीसीएमआरएल’ला या प्रकल्पाचे काम दिले आहे.

केंद्र सरकारच्या ‘न्यू मेट्रो पॉलिसी २०१७’ अंतर्गत पायाभूत सुविधांमध्ये खासगी गुंतवणुकीला प्रोत्साहन देणारा हा पहिलाच मोठा प्रकल्प आहे. शहराचे सौंदर्य अबाधित राखण्यासाठी या प्रकल्पात ओव्हरहेड वायर्सऐवजी ‘७५० व्ही डीसी थर्ड-रेल विद्युतीकरण प्रणाली’ वापरण्यात आली आहे.

तसेच, सुरक्षितता आणि अचूक वेळेसाठी प्रगत ‘सीबीटीसी’ (कम्युनिकेशन बेस्ड ट्रेन कंट्रोल) सिग्नलिंग यंत्रणा बसवण्यात आली आहे. प्रवाशांसाठी अल्स्टॉम कंपनीचे अत्याधुनिक डबे (रोलिंग स्टॉक) वापरण्यात येणार असून, माण, हिंजवडी येथे एक अद्ययावत देखभाल आगार उभारण्यात आले आहे.

या नव्या मेट्रोमुळे वाकड, बाणेर, बालेवाडी आणि विद्यापीठ चौक या महत्त्वाच्या भागांतील वाहतूक कोंडीतून नागरिकांची सुटका होणार आहे. विशेष म्हणजे, या लाईन ३ चे पुणे मेट्रोच्या लाईन १ आणि २ शी इंटरचेंज केले जाईल.

तसेच, शिवाजीनगर रेल्वे स्थानक, बस डेपो आणि पुणे-बंगळुरू महामार्गावरील प्रवाशांना थेट मेट्रोची कनेक्टिव्हिटी मिळणार आहे. एकूण विजेच्या वापरापैकी एक-तृतीयांश वीज स्थानकांवरील रूफटॉप सोलर सिस्टीममधून निर्माण करण्याचे हरित उद्दिष्टही या प्रकल्पाने ठेवले आहे.

“हिंजवडी ते शिवाजीनगर मेट्रो मार्गावरील सेवा लवकरात लवकर सुरू करण्यास आमचे प्राधान्य आहे. मेट्रो सेवा सुरू करण्याबाबत मुख्यमंत्री कार्यालयाला पत्र लिहिले होते. पुढील महिन्याच्या पहिल्या आठवड्यात ही सेवा सुरू होण्याची शक्यता आहे.” – डॉ. अभिजित चौधरी, महानगर आयुक्त, पीएमआरडीए

pune : ओव्हरहेड केबल धोरणाला महासभेचा ‘ब्रेक’