Fugitives wanted by India | पंजाब नॅशनल बँकेतील हजारो कोटींच्या घोटाळ्यात फरार असलेला मुख्य आरोपी मेहुल चोक्सीला बेल्जियममध्ये अटक करण्यात आली आहे. चोक्सीसह देशातील बँकिंग व्यवस्थेला हादरवून सोडणाऱ्या आणि हजारो कोटींची फसवणूक करून परदेशात पळून गेलेल्या काही आर्थिक गुन्हेगारांवर अजूनही कारवाईची प्रक्रिया सुरू आहे.

मेहुल चोक्सीसोबतच असे अनेक फरार आर्थिक गुन्हेगार आहेत, ज्यांच्या प्रत्यार्पणासाठी भारत सरकारकडून प्रयत्न केले जात आहेत. हे फरार आरोपी कोण आहेत, ते जाणून घेऊया.

मेहुल चोक्सी

2018 मध्ये उजेडात आलेल्या पंजाब नॅशनल बँकच्या 13,500 कोटी रुपयांच्या घोटाळ्यात मेहुल चोक्सी यांचं प्रमुख नाव समोर आलं. त्यांनी भाचा नीरव मोदीसोबत संगनमत करून बनावट ‘लेटर ऑफ अंडरटेकिंग’चा वापर करत बँकेची मोठी फसवणूक केल्याचा आरोप आहे. घोटाळा समोर आल्यानंतर चोक्सी भारतातून अँटिग्वा आणि बार्बुडा येथे पळाला. आता त्याला बेल्जियममध्ये अटक करण्यात आली आहे.

विजय माल्या

किंगफिशर एअरलाइन्स आणि युनायटेड ब्रेवरीज ग्रुपचा माजी प्रमुख विजय माल्यावर भारतीय बँकांकडून घेतलेल्या 9,000 कोटी रुपयांपेक्षा अधिक कर्जाची फसवणूक केल्याचा आरोप आहे. हे कर्ज त्ये एअरलाइन्ससाठी घेतले असले तरी, ते अन्य कारणांसाठी वापरल्याचा संशय आहे. 2016 मध्ये तो ब्रिटनला पळून गेले. त्याचा प्रत्यार्पण खटला लंडनच्या उच्च न्यायालयात सुरू आहे.

नीरव मोदी

नीरव मोदीची स्वतःची ‘नीरव मोदी’ ब्रँड नावाची लक्झरी ज्वेलरी कंपनी आहे. हा देखील PNB घोटाळ्यात मुख्य आरोपी आहे. मेहुल चोक्सीसोबत त्याने बनावट कागदपत्रांच्या माध्यमातून परदेशी बँकांकडून कर्ज मिळवले आणि परत न करता बँकेला आर्थिक नुकसान पोहोचवले. तो 2018 मध्ये भारतातून पळाला. 2019 मध्ये त्याला अटक करण्यात आली. त्यांचा प्रत्यार्पण खटला वेस्टमिन्स्टर मॅजिस्ट्रेट कोर्टात सुरू असून, भारत सरकार परत आणण्यासाठी प्रयत्न केले जात आहेत.

नितीन संदेसरा

नितीन संदेसरा, स्टर्लिंग बायोटेक कंपनीचा प्रमुख असून त्याच्यावर 5,700 कोटी रुपयांची बँक फसवणूक आणि मनी लाँड्रिंग प्रकरणात गुन्हा दाखल आहे. 2017 मध्ये तो नायजेरियाला पळून गेले आणि तिथेच नागरिकत्व मिळाले. त्यानंतर अल्बेनियामध्येही नागरिकत्व घेतल्याचे समोर आले. त्याने बनावट कंपन्यांच्या माध्यमातून बँकांना गंडा घातल्याचा आरोप आहे.

ललित मोदी

ललित मोदी हा  इंडियन प्रीमियर लीग (IPL) चा पहिला अध्यक्ष आहे, त्याच्यावर आयपीएलमधील आर्थिक अनियमिततेचे गंभीर आरोप आहेत. 2010 मध्ये तो भारतातून ब्रिटनला पळून गेला. बीसीसीआयने त्याच्यावर आजीवन बंदी घातली आहे. त्याच्यावर फ्रँचायझी लिलाव प्रक्रियेत गैरप्रकार केल्याचा ठपका आहे.