श्रीनगर : इराण आणि इस्रायलमधील युद्धादरम्यान, रविवारी सकाळी अमेरिकेने इराणच्या तीन प्रमुख अणु केंद्रांवर हल्ला केला. अमेरिकेचे अध्यक्ष डोनाल्ड ट्रम्प यांनी त्यांना पूर्णपणे उद्ध्वस्त केल्याचा दावा केला. या हल्ल्यानंतर भारतातही राजकीय गोंधळ दिसू लागला आहे. जम्मू-काश्मीरच्या माजी मुख्यमंत्री आणि पीपल्स डेमोक्रॅटिक पार्टीच्या (पीडीपी) प्रमुख मेहबूबा मुफ्ती यांनी या हल्ल्याचा तीव्र शब्दात निषेध केला आहे.

मेहबूबा मुफ्ती यांनी मुस्लिम देशांच्या गटावर ओआयसी आणि विशेषतः पाकिस्तानवर निशाणा साधला आहे. तसेच त्यांनी भारत सरकारचे मौन खेदजनक असल्याचेही म्हटले आहे. सोशल मीडिया प्लॅटफॉर्म एक्सवरील त्यांच्या प्रतिक्रियेत त्यांनी लिहिले आहे की, अपेक्षेप्रमाणे इराणवरील हल्ल्यानंतर ओआयसीने पुन्हा एकदा केवळ तोंडी प्रतिसाद दिला आहे. दरम्यान, नोबेल शांतता पुरस्कारासाठी ज्यांनी घाईने डोनाल्ड ट्रम्प यांच्या नावाची शिफारस केली होती त्या देशाला आता इराणवरील हल्ल्यानंतर लाज वाटते आहे.

मेहबूबा मुफ्ती यांनी नाव जरी घेतले नसले तरी त्यांचा इशारा स्पष्टपणे पाकिस्तानकडे होता. पाकिस्तानचे लष्करप्रमुख जनरल असीम मुनीर यांनी नुकतीच व्हाइट हाऊसमध्ये डोनाल्ड ट्रम्प यांची भेट घेतली होती. या दरम्यान झालेल्या चर्चेनंतर मुनीर यांनी ट्रम्प यांना नोबेल शांतता पुरस्कार देण्याची शिफारस केली आहे. तथापि, अमेरिकेच्या या ताज्या हल्ल्यानंतर पाकिस्तानची ही शिफारस आता वादाच्या भोवऱ्यात सापडली आहे.

मेहबूबा मुफ्ती यांनी असेही लिहिले की, इराणवर हल्ला करून ट्रम्प यांनी धोकादायकपणे तणाव वाढवला आहे, ज्यामुळे या प्रदेशात हिंसाचाराची नवी लाट सुरू झाली आहे. हे जगाला संघर्षाच्या उंबरठ्यावर घेऊन जात आहे. मेहबूबा मुफ्ती यांच्या व्यतिरिक्त त्यांच्या कन्या इल्तिजा मुफ्ती यांनीही इराणवरील अमेरिकेच्या हल्ल्याचा निषेध केला आहे. त्या म्हणाल्या, हे खूप दुःखद आहे. पाकिस्तानने स्वतः अमेरिकेचे अध्यक्ष डोनाल्ड ट्रम्प यांना नोबेल शांतता पुरस्कार देण्याची शिफारस केली होती, परंतु अमेरिकन लोकांनी इराणवर हल्ला केला, जो अत्यंत निषेधार्ह आहे. सर्व इस्लामिक देशही गप्प आहेत. अगदी भारतही गुन्हेगारी स्वरूपाचे मौन बाळगत आहे.