MEA International Business Expo 2027 : मराठा उद्योजक संघटना (Maratha Entrepreneurs’ Association) यांच्या वतीने आयोजित करण्यात येणाऱ्या ‘एमईए (MEA) आंतरराष्ट्रीय व्यापार प्रदर्शन २०२७’चा लाँचिंग सोहळा पुण्यात उत्साहात पार पडला. ज्येष्ठ नेते शरदचंद्र पवार यांच्या हस्ते या कार्यक्रमाचा शुभारंभ झाला. आमदार रोहित पवार यांची यावेळी प्रमुख उपस्थिती होती.

‘चला, एकत्र वाढूया’ या ध्येयाने काम करणारी MEA संस्था उद्योजकांना एकत्र आणून व्यवसायवाढ, संपर्क वाढविणे, ज्ञानाची देवाणघेवाण आणि नव्या व्यावसायिक संधी निर्माण करण्यासाठी विविध उपक्रम राबवत आहे.

यावेळी उद्योजकांशी संवाद साधताना शरदचंद्र पवार यांनी महाराष्ट्रातील उद्योजकतेच्या वाढीसाठी अशा व्यासपीठांची गरज असल्याचे सांगितले. नव्या पिढीतील उद्योजकांनी पारंपरिक व्यवसायासोबत आधुनिक तंत्रज्ञान, नव्या कल्पना आणि बदलत्या बाजारपेठेचा स्वीकार करून व्यवसायाचा विस्तार करावा, असे आवाहन त्यांनी केले.

आमदार रोहित पवार यांनी MEAच्या कार्याचे कौतुक केले. नवउद्योजकांना योग्य मार्गदर्शन, व्यवसायिक संपर्क आणि बाजारपेठेशी जोडण्याचे काम अशा उपक्रमांतून प्रभावीपणे होऊ शकते, असे त्यांनी सांगितले.

‘एमईए (MEA) आंतरराष्ट्रीय व्यापार प्रदर्शन २०२७’च्या माध्यमातून विविध उद्योगांतील उद्योजक, व्यावसायिक, गुंतवणूकदार आणि ग्राहकांना एकाच व्यासपीठावर आणले जाणार आहे. यामुळे उद्योजकांना नव्या बाजारपेठा, व्यवसायविस्तार, भागीदारी तसेच राष्ट्रीय आणि आंतरराष्ट्रीय स्तरावरील संपर्काच्या संधी मिळणार आहेत.

MEAच्या महिला विभागाच्या माध्यमातून महिला उद्योजिकांना व्यवसायासाठी मार्गदर्शन आणि संपर्काच्या संधी उपलब्ध करून दिल्या जात आहेत. महिला उद्योजकांचा सहभाग वाढवून त्यांना स्वतंत्र व्यावसायिक ओळख निर्माण करून देण्यासाठी संस्थेकडून प्रयत्न केले जात आहेत.

या कार्यक्रमास MEAचे अध्यक्ष विक्रम गायकवाड, प्रवीणदादा गायकवाड, माजी अध्यक्ष अंकुश आसबे, अरुण निम्हण, नितीन भोसले, विजय गवारे, सई बहिरट, सायली काळे, खजिनदार राजेश कुराडे यांच्यासह पदाधिकारी, मुख्य सदस्य, विविध प्रतिनिधी आणि मोठ्या संख्येने उद्योजक उपस्थित होते.

‘एकात्मतेकडून समृद्धीकडे’या संकल्पनेतून उद्योजकांची एकजूट व्यवसायवाढ आणि आर्थिक प्रगतीकडे नेण्याचा MEAचा प्रयत्न आहे. महाराष्ट्रातील उद्योजकांना राष्ट्रीय तसेच आंतरराष्ट्रीय बाजारपेठ उपलब्ध करून देण्यासाठी आगामी काळात अधिक व्यापक उपक्रम राबविण्यात येणार आहेत.