Bharat Gogawale : रायगड जिल्ह्यातील नगरपालिका निवडणुकीच्या रणांगणात आता देवालाही साक्षी ठेवली जातेय. शिवसेना शिंदे गटाचे मंत्री व महायुतीचे बलाढ्य नेते भरत गोगावले यांनी श्रीवर्धन येथे थेट हरिहरेश्वर देवाच्या साक्षीने नवस केला आहे. विधानसभेला ज्यांनी जाणूनबुजून आमच्या विरोधात चुकीचं काम केलं, त्याचा सत्यानाश होवो… त्याचं घर वाटोळं होवो, असा नवस गोगावले यांनी केला आहे. हे वक्तव्य अप्रत्यक्षपणे राष्ट्रवादी काँग्रेस (अजित पवार गट) चे खासदार सुनील तटकरे यांच्यावरच बाण डागणारं असल्याचं स्पष्ट दिसतंय. गोगावले पुढे म्हणाले, आम्ही जर त्यांच्या विरोधात काम केलं असेल तर आम्हाला शिक्षा मिळो. पण ज्यांनी लोकसभेला आम्हाला सोबत घेतलं आणि विधानसभेला पाठ फिरवली, त्यांना धडा शिकवण्यासाठी मी हरिहरेश्वरला नवस करतो. चुकी करणाऱ्याचं वाटोळं व्हावं”, असं ते म्हणाले. या आधी गोगावलेंनी रोह्यातूनच तटकरे कुटुंबीयांना खुलं आव्हान दिलं होतं, लोकसभेला आम्ही तटकरेंचा इमान राखला, पण विधानसभेला त्यांनी आम्हाला फसवलं. यात जर खोटं असेल तर सुनील तटकरे महाडच्या विरेश्वर मंदिरात आणि रोह्याच्या धावीर महाराज मंदिरात फूल उचलून दाखवावं, असं त्यांनी म्हटलं होत. हे आव्हान स्वीकारत अनिकेत तटकरे यांनीही जोरदार प्रत्युत्तर दिलं. आम्ही फूलच नव्हे, तर नारळही ठेवायला तयार आहोत. विधानसभेला आम्ही गोगावले आणि महेंद्र दळवी यांचंच काम केलं. पण आता फेक नरेटिव्ह पसरवले जातंय,” असा टोला त्यांनी यावेळी लगावला. रायगडमध्ये पालकमंत्रिपदापासून सुरू झालेला हा वाद आता इतका टोकाला गेलाय की दोन्ही गट एकमेकांना देवाच्या साक्षीने शपथा घालायला आणि फूल-नारळ ठेवायला तयार आहेत. नगरपालिका निवडणुकीआधीच महायुतीतल्या या अंतर्गत कलहाने राजकीय वातावरण तापलं असून, हरिहरेश्वर देव कोणत्या बाजूचा नवस पूर्ण करणार, हे पाहण्यासाठी सगळ्यांच्याच नजारा खिळल्या आहेत.
