Maval Rain – गेल्या अनेक दिवसांपासून वाढत्या उकाड्याने आणि दमट वातावरणाने हैराण झालेल्या नागरिकांना अखेर पावसाने मोठा दिलासा दिला आहे. तालुक्यातील कान्हे, नायगाव, कामशेत परिसरासह पवनमावळ आणि पवनानगर सारख्या अनेक भागांमध्ये झालेल्या दमदार पावसामुळे वातावरणात गारवा निर्माण झाला. त्यामुळे वरूणराजाच्या प्रतिक्षेत असलेल्या शेतकरी वर्गातही समाधानाचे वातावरण पसरले आहे. यंदा मान्सूनचे आगमन झाले असले तरी अपेक्षित प्रमाणात पाऊस होत नसल्याने शेतकरी चिंतेत होते.

भात रोपवाटिका तयार होऊनही शेतांमध्ये पुरेसे पाणी साचत नसल्याने लागवडीची कामे खोळंबली होती. अनेक शेतकऱ्यांनी मशागत, नांगरणी आणि लागवडीपूर्व तयारी पूर्ण केली होती. मात्र पावसाने ओढ दिल्यामुळे पुढील नियोजन रखडले होते. त्यामुळे शेतकरी आकाशाकडे डोळे लावून बसले होते. रविवारी दुपारनंतर अचानक वातावरणात बदल झाला. ढग दाटून आले आणि काही वेळातच जोरदार पावसाला सुरुवात झाली. सुमारे तासभर कोसळलेल्या पावसामुळे परिसरातील शेतांमध्ये पाणी साचू लागले.

त्यामुळे भात लागवडीसाठी पोषक परिस्थिती निर्माण झाली आहे. गेल्या काही दिवसांपासून रोपे तयार होती, पण पाण्याअभावी लागवड करता येत नव्हती. आता पाऊस झाल्याने लागवडीच्या कामांना सुरुवात करता येईल, अशी प्रतिक्रिया अनेक शेतकऱ्यांनी व्यक्त केली. येत्या काही दिवसांतही पावसाचा जोर कायम राहिल्यास भात लागवडीला अधिक वेग मिळणार असल्याचेही शेतकऱ्यांकडून सांगितले जात आहे. या पावसामुळे केवळ शेतीलाच नव्हे तर सर्वसामान्य नागरिकांनाही दिलासा मिळाला आहे.

उकाडा आणि दमट वातावरणामुळे नागरिक त्रस्त झाले होते. पावसानंतर वातावरणात गारवा निर्माण झाल्याने नागरिकांनीही समाधान व्यक्त केले. अनेक ठिकाणी मुले आणि युवकांनी पावसाचा आनंद लुटताना पाहायला मिळाले. दरम्यान, जोरदार पावसामुळे परिसरातील लहान-मोठे ओढे, नाले वाहू लागले असून डोंगररांगांवर हिरवाईचे नवे रूप खुलू लागले आहे. त्यामुळे परिसरातील निसर्गसौंदर्य अधिकच खुलून आले असून धुक्याची चादर आणि पावसाच्या सरींमुळे परिसराला मनमोहक स्वरूप प्राप्त झाले आहे.

शेतकरी वर्गाच्या दृष्टीने खरीप हंगामातील सुरुवातीचा पाऊस अत्यंत महत्त्वाचा मानला जातो. त्यामुळे या पावसामुळे भात लागवडीच्या कामांना चालना मिळणार असून यंदाचा खरीप हंगाम समाधानकारक ठरेल, अशी भावना शेतकरी व्यक्त करत आहेत. आता पुढील काही दिवस मान्सून सक्रिय राहून नियमित पाऊस झाल्यास मावळातील शेतीला मोठा आधार मिळणार असल्याचेही शेतकऱ्यांकडून सांगितले जात आहे.